Need for Speed kan khel a, hmeichhe awin kalna tur min lo hrilh zel a, a aw ringawt pawh ngaihzawn tham a ni, amah hmuh hlan kan nghakhlel em em thin a nih kha. I game ngainat deuhah khan i mi ngaihsan tak character a awm phei chuan i ngainatna a tih zual phah ngei ang.
First person shooter game Call of Duty thar ber Infinite Warfare-ah UFC star Conor McGregor a lang ve dawn e. Activision game Call of Duty series thar ber tur Infinite Warfare hi kumin November ni 4-a tlangzarh a ni dawn a. PlayStation 4, Xbox One, Microsoft Windows-ah te a khelh theih ang.
McGregor-a'n a insawi dan chuan, zing a tho a, gym-ah hun hmangin darkar hnih atanga darkar thum MMA training a nei a. Inah a hawng a, Call of Duty: Black Ops II" a khel thin. A ngaihzawngin hna thawka a chhuahsan hnuah a mu hahdam a, a thiannu chu a rawn haw hunah a tho leh a. Chutiang chuan hun a hmang thin.
Vawiinah chuan a game ngainat em em Call of Duty-ah McGregor chu a lang ve dawn ta reng mai. Infinite Warfare-ah hian Campaign Story-ah Marine-ah a tang dawn a. UFC fighter zinga hetiang game-a an rawih hmasak ber a ni dawn ta a ni.
"He thila min telh ve hi ka tan chuan chawimawina a ni ringawt mai. Tin, ka UFC fighter puite tana hetiang lama hmahruaitu ka ni thei hi hlu ka ti a. Ka hlim hle nghe nghe a ni," tiin McGregor chuan ESPN a hrilh a ni.
Video game hi khawvela sumdawnna thangduang ber pakhat a ni chho mek a, Hollywood movie industry aiin Gaming industry hian an hlep hnem chho ta zak zak mai le. MMA lama khawvela fans ngah McGregor hian nasa takin Call of Duty hi a vawrh leh ngei dawn bawk a. A changkang lam zel an pan avanga gamer ten an sawisel Call of Duty chuan fans a hloh tam dawn lo tawp mai.
Tun October thlaa tlangzarh tur Battlefied 1 chuan World World 1 hun lai an rawn thar thawh leh dawn a, first person shooter game ngaina ten an fak nasa hle. Hetih lai hian Call of Duty erawh a changkang tawh lutuk a, fans lamin an ngainat loh thu an sawi mek, mahse McGregor hian nasa takin Call of Duty hi a rawn vawrh ngei dawn chiang a ni.
McGregor-a agent Audie Attar chuan, "Coner hi a phur hle a, hetiang lamah hian nasa taka huang zauh pawh a chak. A larna chu sumdawnna lian taka chhuah zel turin sumdawnna lian dangte nen pawh indawrna kan nei zel a, khawvela brand lian ber berte nena thawh hona kawngah pawh kan inzarpharh zel dawn a ni." tiin ESPN a hrilh.
Infinite Warfare hi tunah hian PS4 leh Xbox One-ah an pre-order mek a, August ni 27 khan United States-ah ringawt pawh mi 163,000 chuangin an order tawh a ni.