January transfer window inhawn lai khan Arsenal leh Chelsea te chuan Caicedo lak tumin hma an la, Arsenal khan an la teuh hle nghe nghe a nih kha.
Brighton Captain Lewis Dunk chuan an midfielder hi Seagulls chuan an chelh tlat tur thu a sawi chhuak ve leh.
He Ecuadorian midfielder hi January transfer window tawp lama hming lar leh sawi hlawh berte zinga mi a ni a, Arsenal leh Chelsea Chuan theih tawpin lak luh an tum.
Arsenal phei kha chuan vawi hnih an dawr a, mahse Brighton chuan Arsenal dawrna hi an hnawl ta nge nge a nih kha.
Transfer window inhawn lai kha chuan Caicedo tan pawh boruak a rip khawp mai, Arsenal kha pan a chak si, social media-ah Brighton chhuahsan a duh thu te a tarlang a, club training atanga chawlhtir ngai khawpin a khawsa a nih kha.
Transfer Window inkhar veleh Caicedo chu tha takin club-in an lo dawngsawng leh a, captain Dunk chuan kum 21 mi tana hun harsa takah hian a kianga an awm reng thu sawiin, an player tha an chelh tlat avangin club chu a fak bawk.
"Caicedo-a tan hian hun harsa tak a ni a, hetiang hun footballer-in an tawn hi a vawikhatna a ni lo a, a tawpna tur a ni lo bawk. A la naupang a, chuvangin kan chelh tlat a ni.
"Eng chen nge kan kawl theih dawn chu kan hre lo, mahse tun season chhung tal kan kawl thei tur hi kan lawm a, a aia rei kan kawl theih pawh kan beisei hle.
"Club tan pawh thil lian tham tak a ni a, kum tam tak chhung player tha tak tak club lian zawkah kan lo hralh tawh thin.
"Kan tana khel tura kan duh zia kan lantir dan kha ka fak a, tih tur dik tak a niin ka hre bawk," tiin Dunk chuan a sawi.
Caicedo leh Dunk hian tun season Premier League-ah Brighton thlen theih sang ber hruai thlen tumin club tan theihtawp an chhuah ngei dawn a.
Seagulls hi Roberto kaihhruaina hnuaiah 6-naah awm mekin, 5-naa a awm Tottenham laka point 5-in an hniam. Mahse Tottenham hian game hnihin an khel tam zawk a ni.
Seagulls boss pawhin Brighton tantute'n Caicedo an lo dawnsawn leh danah lawmthu a sawi.
"Fan-te'n Moises-a an lo dawnsawn danah ka lawm em em a ni. Kan tanrual hian kan chak tih hi ka ring tlat a, Moises-a leh fan-te nen, an thlawpna avang hian kan chak a ni," tiin De Zerbi chuan a sawi.
Inrinni hian Brighton chuan Palace an tlawh dawn, World Cup zawha domestic football tan leh a nih hnu khan Brighton hian hneh loh pakhat chiah an la nei a, Premier League-ah Arsenal lakah an lo tlawm tawh a ni.