Busquets tan World Cup hnuhnung ber ni lo mai thei

23rd November 2022, 03:11PM

Spain captain Sergio Busquets chuan Qatar World Cup hi atan World Cup hnuhnung ber a nih leh nih loh turah eng thutlukna mah a la siam loh thu a sawi.

Barcelona defensive-midfielder hi Spain-in 2010 a World Cup leh Euro 2012 nomawi an hawn ṭum khan a lo tel tawh a, World Cup bikah ṭum li a inlanna tur a ni.

Khawvela defensive-midfielder ṭha ber pawl ti a chhal ngam hian a duhthusam chu a captain-na hnuaiah Qatar World Cup champion pui a ni.

Kum 34 a upa Busquets chuan ti hian a sawi, “Helai hmunah hian ka hlim a, World Cup ka khelh vawi hnihna a ni emaw vawi lina a ni emaw tih lamah hian ka buai lo. Ka tana World Cup hnuhnung ber tur a nih leh nih loh thuah pawh eng thutlukna mah ka la siam lo,” tiin.

Spain hi Group F-ah awmin, zanin dar 9:30 ah group stage-a an match hmasa ber an khel dawn a, Costa Rica nen an inhmachhawn ang. Costa Rica lo hi Germany leh Japan an la hmabak bawk.

Captain Busquets hian kum 2010 aṭang khan World Cup hi a khel ṭan a, kumin tih loah chuan vawi 3 a khel tawh. Heng World Cup a khelh tawh ṭum thumah hian an match hmasa berah an la chak lo vek a, Busquets hi a la inlan vek nghe nghe. World bikah game 13 a inlan tawh a ni.

Spain tan hian Busquets hian kum 2009 khan inlan ṭanin, inelna hrang hrangah vawi 139 a inlan tawh a, goal hnih a thun ve tawh.

An left-back Jose Gaya chu training naa a inhliam avangin squad aṭangin a inhnukdawk a, a aiawh tur hian Barcelona left-back kum 19 mi Alejandro Balde chu koh a ni.

Copyright © inkhel.com 2022. All rights reserved.