Bundesliga: Bayern-in Frankfurt an sawp nghal

06th August 2022, 07:08AM

2022-23 Bundesliga season a game hmasa berah Zirtawpni zan khan, champion lai Bayern Munich chuan Europa League champion lai Eintracht Frankfurt an tlawh a, 6-1 laiin Bayern hian hnehna an chang.

Bayern tan hian Jamal Musiala chuan goal hnih a khung a, Joshua Kimmich, Benjamin Pavard, Sadio Mane keh Serge Gnabry te chuan goal khat theuh an khung bawk a, Frankfurt goal neihchhun hi Randal Kolo Muani thun a ni.

Inkhel tan atanga minute nganaah German footballer Kimmich chuan 2022-23 Bundesliga season-a goal hmasa ber khungin, Bayern hma a hruaipui nghal a, French defender Pavard chuan minute nga hnuah Bayern goal hnihna a khung zui leh bawk.

Darkar chanve an khelh tlin hma hretin, Sadio Mane chuan Gnabry-a cross chu lo tauh lut a, Bayern tana a Bundesliga game hmasa berah Liverpool forward hlui hian goal a khung nghal a, 3-0 in Bayern in hma an hruai.

Mane-a goal khung atanga minute ruk hnuah Musiala chuan Bayern goal lina a khung a, Mane chuan ball khalhin, Thomas Muller a pe a, Muller hian Musiala pe ve lehin, goal-ah a lo chan tir a, 4-0 a ni.

Bayern hian first half-ah goal an la khung duhtawk lova, half time hma deuhin Gnabry chuan goal a khung ve leh a, 5-0 in first half tihtawp a ni.

Darkar khat chuang hret an khelhin, mual neitu lam Frankfurt-in goal an rawn khung a, Bayern goalkeeper Manuel Neuer-a tihsual hmang tangkaiin Frankurt hian goal khungin, goal khungtu hi Muani a ni.

5-1 a nih reng hnuah, Bayern hian 80mins chuang an khelhin goal an khung belh leh a, Leroy Sane-a hnen atanga a ball dawn chu Musiala chuan goal-ah khungin, Bayern hian nuamsa takin khual mualah point 3 an hlawhchhuak ta a ni.

Copyright © inkhel.com 2022. All rights reserved.