Nikum October thla khan Brighton chuan kum 2025 thleng daih contract thar an ziahpui, mahse Liverpool lamin an awh em avangin loh theih lohin Mac Allister chu a chhuah a ngai ta.

Mac Allister-a man hi a to reuh zek a rinawm, Argentina tan ropui takin a khel a, Brighton tan pawh a thiam zia a lantir, club liante pawhin hmachhawn harsa an ti thin. 

Mac Allister hian season liam ta khan Brighton tan game 40 atangin goal 12 a khung a, assist vawi 3 a nei ve bawk. Table-ah 6-na niin Roberto De Zerbi leh a team-te chuan season tharah European championship an khel ve thei tawh dawn. 

De Zerbi chuan a midfielder hmanthiam hi a ui em em, "Alexis ka enkawl thei kha ka inchhuang em em, talent nei tha tak a ni a, ani nena kan thawk dun thei kha ka tan chuan a hlu tak zet a ni. A kal zelna turah duhsakna ka hlan e," tiin De Zerbi  chuan Mac Allister a thlah.

Brighton Chairman Tony Bloom chuan, "Brighton chuan Alexis hi kan chhuang em em a, chutih laiin min chhuahsan ta erawh a hrehawm kan ti hle.

"Kan tan ropui takin a khel a, Brighton player zinga World Cup winner ni thei hmasa ber a ni bawk. Season kan hman that ber tuma kan player pawimawh ber a ni.

"Amex-ah hian engtik lai pawhin kan lo welcome reng dawn. Ropui taka kan khelh thin dan te  kha kan mitthlaah a cham reng tawh dawn, Albion fans aiawhin, Alexis-a chungah lawm thu ka sawi a, Brighton chuan a kal zelna turah duhsakna kan hlan mawlh mawlh bawk a ni," tiin a sawi bawk.