Premier League club Brighton chuan defender thar an nei a, Italian club Fiorentina atangin Igor Julio an lalut a, a manah euro maktaduai 17 sengin kum li daih contract an ziahpui.

Brazilian centre-back hi tun nipui bazar chhunga Brighton player lakluh pangana a ni a, Brighton manager Roberto de Zerbi chuan position pawimawh takah player pawimawh tak an lakluh thu a sawi.

Season liamta khan Brighton hian Chelsea centre-back Levi Colwill chu loan an kawl a, season tluanin Colwill hi an player pawimawh niin, Premier League-a parukna an nih theihna kawngah pawh kum 20 mi hi a pawimawh hle.

Brighton hian Colwill lei tum hian hma an la zui a, a manah pound maktaduai 40 thehchhuak mah se Chelsea hian Colwill hi hralh tumna an neih loh avangin an hnawl a, Brighton hian kum 25 mi Igor-a lam hi an hawi ta niin a lang.

Tun nipui bazar chhungin Brighton hian Watford atangin Joao Pedro chu pound maktaduai 30-a an lei tawh bakah, Anderlecht atangin Bart Verbruggen chu pound maktaduai 16.3 in an lei tawh a, James Milner leh Mahmoud Dahoud te chu free transfer ve ve in an lalut tawh bawk a ni.