UFC Fighter tha kan sawi apianga kan sawiloh theihloh chu Brian Ortega hi a ni ngei ang. A fight hnuhnung berah fighter tawnhriat ngah tak Frankie Edgar a knockout a, Edgar knockout thei hmasa ber a ni bawk. A fight leh turah champion Max Holloway nen an innuai dawn a, fight hmuhnawm tak a nih ngei rin a ni.
Tu nge Brian Ortega chu?
Brian T. City Ortega hi UFC Fighter zingah chuan inpawmchilh lamah chuan a tha ber pawl a ni ngei ang. February 21, 1991-ah a piang a, kum 2010 atang khan MMA-ah hian professional fight a lo khel tawh. Ortega hi Mexican thlah a ni a, MMA a luhchilh hma hian Gracie Academy hnuaiah Jiu Jitsu a zir thin. Kum 17 a nihin James Luhrsen hnuaiah boxing a zir tan a, MMA fight a neih naah pawh a pui hle. UFC lama a luh hma hian RFA featherweight champion a ni bawk.
Ultimate Fighting Championship
Fighter hmasawn duh mi a nih angin organisation lian zawka fight a duh zel a, July 26, 2014 khan a UFC match hmasa berah Mike De La Torre nen an inbei a, first round-ah submission in a chak nghe nghe. Nimahsela fight a neih zawhah Ortega hian damdawi hman phal loh a lo hman vangin a match hmasa ber hi 'no contest' ah an dah ta thung a ni.
A match lehah Thiago Tavares chu round 3-ah T.K.O-in a hneh a, hemi zawha a fight-ah fighter rothap Clay Guida a knockout chuan khawvel a barakhaih zui hle. Fighter rothap Clay Guida a hneh hnu hian Renato Moicano nen an innuai leh. Hemi tum pawh hian submission hmangin hnehna a chang leh bawk. Fight hmuhnawm tak a ni bawk a niang, 'Fight of the Night' ah puan a ni zui bawk. A fight hnuhnung pahnihah top Contender pahnih Cub Swanson leh Frankie Edgar te a tlawm ve ve a, champion lai Max Holloway nen title fight-ah an innuai ang.
Featherweight Champion ka nih hnuah lightweight lamah ka khel ang
Brian Ortega hi UFC Featherweight ah chuan a lian hle a, a fight hnuhnung bera 'Frankie Edgar' a hneh takah pawh a taksa lenna a hmang tangkai hle. A match leh turah Max Holloway nen an intum dawn a, champion Holloway pawh hi featherweight-ah chuan a lian hle a ni. Fighter tam takin beiseina an nei sang a, match hmuhnawm tak a nei thei zel bawk. Ortega hian Max Holloway hneh thei turin thiamna a nei sang hle niin a insawi a, featherweight champion anih hnuah lightweight lam thlengin champion thei turin thiamna a nei niin a insawi bawk.
UFC lama a hlawhtlinna langsar zualte-
1.Fight of the Night(3 times)
2.Performance of the Night(2 times) vs Cub Swanson and Frankie Edgar.