Premier League club Brentford chuan Premier League club Wolves atangin Nathan Collins an lalut dawn a, Collins hi Brentford chanchina an player lakluh man to ber a ni dawn.

Irish centre-back manah hian Brentford hian pound maktaduai 23 an seng dawn a, a chungchangah Brentford leh Wolves te hian inremna nei tawhin, medical chiah hmabak a awm tawh a, tun kar chhungin medical hi a neih fel theih a rinawm.

Tunah hian German forward Kevin Schade chu Brentford player man to ber a ni mek a, season liamta khan kum 21 mi hi Brentford hian Freiburg atangin loan-in an lalut a, thla hmasa khan pound maktaduai 21 sengin an lei nghet a, tun nipui bazar chhungin Brentford hian transfer record thar vawi hnih an nei dawn tihna a ni.

London-a insuan tur Collins hian nikum mai khan Burnley atangin Wolves a zawm a, Wolves hian a manah pound maktaduai 20 bawr vel an seng a, season liamta khan kum 22 mi hian Wolves tan Premier League-ah game 26 a khel.

Collins hi Republic of Ireland U17, U19 leh U21 player hlui a ni a, kum 2021 atang khan Republic of Ireland senior team-ah awm tanin, a ram tan hian game 14 khel tawhin, goal 2 a thun tawh a ni.