Inrinni zan khan Premier League inkhelah Arsenal chuan Brentford an mikhual a, London derby-ah hian 2-1 in Arsenal hian hnehna pawimawh em em an chang.

Emirates Stadium-ah hian Arsenal tan Declan Rice leh Kai Havertz te chuan goal an khung a, away team goal khat hi Yoane Wissa khung niin, Arsenal hian point 3 hlu tak an hlawhchhuak.

Brentford laka an chak hnu hian Arsenal hi Premier League table chung berah an chho a, khelh 28 atangin point 64 an hlawhchhuak tawh. Arsenal hi pahnihnaa awm Liverpool aiin point khatin an sang a, pathumnaa awm Manchester City aiin point hnihin an sang bawk a, mahse Arsenal hi Liverpool leh City te aiin khelh khatin an khel tam zawk.

Zanin hian Liverpool leh Manchester City te hi Anfield-ah an inhmachhawn dawn a, an result-a zirin Arsenal dinhmun a la danglam thei a, tun season title race a hmuhnawm chho telh telh a, Arsenal hian khelh 10 bak an nei tawh lo.

Arsenal hian minute sawmhnih an khelhin an goal hmasa zawk an khung a, Ben White chuan dinglam atangin Brentford box-ah ball a vawrh lut a, hei hi Rice chuan lo tauh lutin Arsenal hma a hruaipui.

Arsenal hian an first choice goalkeeper David Raya chu Brentford atanga loan-a an kawl mek a nih avangin Brentford lakah hian an chhawr thei lova, Aaron Ramsdale chuan si ban nghakin, hei hi nikum September thla ni 3 hnua Ramsdale-a’n Premier League inkhela inkhel bul a tan leh vawi khatna a ni.

Ramsdale-a tih sual avangin Arsenal hian goal an chhuah a, first half injury time-ah Brentford in an si phurh an rul. Arsenal hi an tlarhnunga ball in pe in, Ramsdale chuan awlsam taka ball a pet chhuah theih laiin Wissa-a’n a rawn nangching hman a, Ramsdale-a ball pet chhuah tur hi Wissa chuan lo dan sakin, hei hi goal-ah a lut chhunzawm a, 1-1 in first half a tawp.

Second half-ah Arsenal hian goal khung belh tum hle mah se an khung lawk thei lova, 90mins dawnah an chakna goal an khung chauh. 86mins-ah White-a ball cross chu Havertz chuan goal-ah tauh lutin hei hi Arsenal in an chakpui.

Havertz hian heti hian a zawnin Premier League game 4-ah goal a khung tawh a, Premier League-a a zawna game 4 chhung goal a khung vawi khatna a ni. Havertz-a’n goal a khung hma deuh hian Arsenal in goal an khung teuh hle a, Rice chuan box pawn atangin goal kham a pet per. 2-1 in inkhel a tawp a, Arsenal hian Boxing Day hnua a vawi khat nan Premier League table chung ber an luah leh ta a ni.