Brazilian rawlthar Chelsea leh Barcelona te'n an duh

02nd December 2022, 09:12AM

Chelsea leh Barcelona te chuan Newcastle United lei hual Brazilian rawlthar Andrey Sontos chu lei tumin an hel ve mek tih 90min chuan a tarlang.

Kum 18 a upa Santos hi Newcastle hian thla 12 chuang chu an lo thlithlai tawh a, a club khelhna Vasco da Gama pawh hi kumin nipui transfer khan an lo be daih tawh bawk.

Newcastle hian Santos hi Brazilian rawlthar zinga tha ber a nih thu leh nakkum January hian lakluh ngei an tum leh dawn a ni.

Amaherawhchu, Newcastle nen an la inbiak rem miau loh avangin Vasco lam hian Santos lei duha betu an la nei reng a, chung zingah chuan Chelsea leh Barcelona te pawh an tel tih 90min chuan a tarlang.

Footballer lar tak tak leh man to tak takte club lian te’n lei tuma an inchuh luih luih laiin Chelsea neitu thar Todd Boehly erawh hi chuan nakin lawka hming la chher mai tur player naupang tak tak, theihna nei sang si an lakluh hian a tiphur mah zawk niin a sawi.

Chutiang vang chuan Chelsea hian player naupang thlithlai an nei nual a, Real Madrid leh PSG te lei hual Palmeiras striker kum 19 chauha upa Endrick leh Dynamo Moscow midfielder kum 19 a upa Arsen Zakharyan te pawh an thlithlai zingah hian an tel a. Kumin nipui lai pawh khan players naupang tak ve ve Cesare Casadei leh Carney Chukwuemeka te pawh Chelsea hian an lo la lut tawh a ni.

Santos lei ngei tum hian Chelsea hian hma an la tan der tawh a, Vasco lam nen pawh inbiakna an kalpui tan der tawh, lei tuma inchuhte zingah hian a chant ha an chan theih ngei an inbeisei. Chutiang bawkin Barcelona lam pawh hian an be ve tawh bawk a, mahse anni hi chuan nakkum January a lakluh nghal tut tut an tum hran lo a, nipui transfer lam an hawi mah zawk.

Andrey Santos hi tunah Brazilian football second division lamah senior team tan a khel mek a, midfielder anga khelin, match 33 a khelh tawhah goal 8 lai chu Vasco tan a thun ve tawh a ni.

Copyright © inkhel.com 2024. All rights reserved.