Brazil in Neymar chanchin an ngaichang

03rd December 2022, 01:12PM

Brazil team doctor chuan “hun kan lamah a tang,” tiin a sawi a, chuvang chuan South Korea nen match hautak tak an khelh hunah an star Neymar hi a khelh theih tawh ngei beisei a ni.

An coach Tite pawhin fimkhur taka knockout round an khelh tur thu leh Neymar a rawn let hman a beisei thu a sawi ve bawk.

Selecao (Brazil national football team) hian Cameroon lakah si khat faiin tlawm mah se Group G hmahruaitu niin Group H a pahnihna South Korea nen an inhmachhawn ang.

An hmachhawn tur chu tupawh nise, Brazil tan Neymar a lo kir leh an beiseina hian a tilawm a, nimahsela, Neymar hian an match hmasa bera a inhliam atang khan ball nen training a la nei leh lo hrim hrim a ni.

Brazil team doctor Rodrigo Lasmar chuan, “Darkar 72 zen zawn kan la nei a, hun hi kan lamah a tang ang a, he thil hi kan thlentir thei ngei ang,” tiin Neymar a lo let leh theih ngei a beisei thu zirtawpni zan khan a sawi.

An star Neymar telin emaw tel lo pawhin an coach Tite hian ngaihtha taka awmna chi ah a ngai lo a, heti hian a sawi – “Cameroon lakah kan chak lo a, Portugal pawh South Korea lakah an tlawm. France pawh Tunisia lakah an chak lo a, Saudi Arabia lakah Argentina an tlawm bawk. Hemi atang ringawt pawh hian kan fimkhurna chhan tur chu a chiangin ka hria.”

“Match hahthlak tak leh hautak tak a ni dawn a, kan khelh hma hi chuan eng ngaihdan mah siam ngawt theih niin ka hre lo.”

“Cameroon nena kan inhmachhawn tum pawh khan kan fimkhur em em a, kan tlin tawh avang ngawtin ngaihsam takin kan khel lo, kan theihtawp kan chhuah ve tho. Mahse, an rawn khel tha em em a, Tunisia leh midang dangte ang bawk khan chak kha an phu a ni.”

“Chuvang chuan eng match mah hi awlsam tak a awm dawn lo a, chan tha zawk kan ni kan ti thei lo ang,” tiin a sawi.

Cameroon an hmachhawn tum khan a first-team atangin mi 9 ngawt a thlak mah se Tite chuan heti hian a sawi chhunzawm leh, “Kan zavaiin kan chak lo a ni. Ram tana rawn penchhuakte hi kan zavaia aiawh an nih ang bawkin an chak a nih chuan kan zavaia chakna a ni a, kan chak lo a nih pawhin kan zavaia chak lohna tho a ni.”

“World Cup hian hun tha vawi hnih min pe dawn lo, a vawikhatna chu vanneihthlak takin kan chang hlauh a ni.”

“Darkar 24 chhung tha leh tui zawng zawng sengin kan inbuatsaih anga, kan tuar tlang vek ang. Ti chuan a tukah chauh kan inpeih ang,” tiin theihtawp an chhuah tur thu a sawi chhunzawm leh.

Brazil forward Neymar leh an full-back Alex Sandro chungchang thuah hian chanchinthar inang lo tak tak a awm nuk a, mahse Sandro hi chuan vawiin inrinni atang hian training a zawm leh theih tawh beisei a ni.

Copyright © inkhel.com 2024. All rights reserved.