Premier League club Bournemouth chuan an manager lailawk ni lai Gary O’Neil chu an manager nghet turin an ruat.
Bournemouth hian kumin August thla khan an manager Scott Parker chu ban a, manager an neih loh chhunga an manager lailawk ni turin Gary O’Neil hi an ruat a, tunah chuan an manager nghet ni turin contract an ziahpui ta a ni.
Kum 39 a upa O’Neil chuan Bournemouth ah hian kum khat leh a chanve chhung daih contract a ziak a, he a contract ah hian Bournemouth lam chuan thla 12 chhung pawhsei theihna an nei bawk ang.
Bournemouth hian O’Neil hi manager lailawk ni tura an lakluh hnuin EPL game 11 an khel tawh a, point 13 an hlawhchhuak tawh. Premier League table-ah hian 14-naah an awm mek.
World Cup chawlh hmaa an match hnuhnung pahnihah Bournemouth hian Everton an hmachhawn ve ve a, an chak ve ve bawk. A hmasa zawk hi Carabao Cup-ah niin 4-1 ngawtin an chak a, an match hnuhnung ber hi Premier League lamah 3-0 in Everton bawk hi an hneh leh a ni.
Bournemouth chief executive Neill Blake chuan O’Neil-a chungchang chu sawiin, “He club a rawn zawm tirh atanga team a enkawl dan hi tha kan ti em em a, chuvang chuan kan team leh club hmasawn zelna tur atan hian kan ringtawk a ni.”
“Gary hian training naah rim tak leh hah takin hna a thawk a, chu a hnathawh that avang chuan players teah pawh hmasawnna kan hmu mek zel. Premier League lamah Everton laka hnehna kan chan tum pawh khan a lang chiang viau a, chuvangin kan hma hun atana he club enkawltu nghet ni tur hian amahah rinna kan nghat ta a ni,” tiin a sawi.
Bournemouth hian Leeds United boss hlui Marcelo Beilsa chu an manager thar ni turin an be hman zet naa, manager an neih loh karlaka lo an chhawr O’Niel hi a nghetin an chhawr ta zawk a ni.
Gary O’Neil hian football player anga a khelh chhung khan midfielder angin a khel thin a, game 450 aia tam mah a khel hman. Chung zingah chuan Portsmouth, Middlesbrough, West Ham, QPR leh Norwich tan pawh a khel hman.
Coaching staff anga a hna hmasa ber hi August 2020 khan a thawk tan a, hetah hian Liverpool U-23 team-ah assistant manager angin a awm a. February 2021 atang khan Bournemouth manager hlui Jonathan Woodgate-a hnuaiah coaching staff ang thoin a lut ve leh a. Kumin August thla khan Bournemouth hian Parker-a enkawlna hnuaiah Liverpool chu 9-0 ngawta an hneh loh hnu khan Parker hi banin, an manager lailawk ni rih turin O’Niel hi an hmang ta a ni.
The Cherries hian World Cup zawha an match hmasa berah Carabao Cup round of 16 chu December ni 22 hian an khel nghal dawn a, hetah hian Newcastle United an hmachhawn ang. December ni 27 hian Premier League lamah Chelsea an hmachhawn leh dawn a ni.