Bologna director Marco di Vaio chuan, an forward Marko Arnautovic chu Manchester United-in ngaihven viau mah se, hralh an tum loh thu a sawi a, a man chhiar pawh an tum loh thu a sawi bawk a ni.

Sunday liamta khan United hian Brighton an hneh loh hnu lawkah, United-in Arnautovic lakluh an tum thu leh Bologna hian an dawrna an lo hnawl thu Sky Italia chuan a tarlang a, United hian an dawr leh dawn em tih a la sawi theih loh.

Kum 33 mi Arnautovic hi Bologna player pawimawh a ni a, season hmasa khan Serie A-ah goal 14 a khung a, Bologna in chhuah tir an phal lo hi a awm hle a ni.

Di Vaio chuan, “Manchester United-in Arnautovic an rawn ngaihven hi a lawmawm kan ti a, chutih rual chuan hralh tumna kan nei lo. Kan president-in a lo sawi tawh angin Bologna-a cham zel turin kan duh a, kan hmachhawpa mi pawimawh ber zinga mi a ni a, a man zat pawh chhiar kan nei lo,” tiin a sawi.

Chanchinbu thenkhat chuan, Italian club hian Arnautovic hi euro maktaduai 15 in an hralh phal tih an tarlang a, mahse United hian a manah euro maktaduai 10 aia tam thehchhuah an tum lo nia sawi a ni bawk a ni.