Benzema leh Courtois Club WC ah inlan thei dawn lo

07th February 2023, 10:02AM

Real Madrid in Club World Cup semi-final ah Al Ahly chu Nilaiani hian an hmachhawn dawn a, hetah hian an player rinrawl pahnih Karim Benzema leh Thibaut Courtois an inlan ve thei dawn lo.

Kar hmasaa Real Madrid in Valencia 2-0 a an hneh tum khan an captain Benzema hian a ke a tina a, hemi avang hian Pathiannia Real Mallorca 1-0 a an hneh loh khut tum pawh khan a inlan thei tawh lo nghe nghe.

Real Madrid goalkeeper Courtois pawh hi Mallorca an hmachhawn hmaa an in warm-up naah a inhliam ve bawk a, a thal bawr a tihnat avangin Mallorca pawh kha a hmachhawn thei lo. Heta an chak lohna avang hian hmahruaitu Barcelona nen point 8 laiin an inthlauh phah ta bawk.

An pahnih hnih hian Madrid squad in nimin lama Moroccan khawpui Rabat pana an zinnaah an tel ve thei loa. Anni bakah hian Eder Militao, Lucas Vazquez, Ferland Mendy leh Eden Hazard te pawh an tel lo bawk.

Madrid hian Egyptian club Al Ahly hi an hneh a nih chuan Inrinni hian final-ah Flamengo emaw Al Hilal an hmachhawn dawn a, hetah hi chuan Benzema leh Courtois te hi inkhel tura an fit hman a rinawm tawh thung.

Madrid hian he inelnaah hian season riat liamta chhung khan vawi li ngawt an lo champion tawh a. He inelna mai bakah hian Champions League round of 16 pawh khelh la hmabakin, Liverpool nen an la inhmachhawn dawn a ni.

Copyright © inkhel.com 2023. All rights reserved.