Joe Zoherliana chuan Indian Super League (ISL) club Bengaluru FC a zawm a, Wungngayam Muirang pawh an la lut nghal bawk a ni.

Lengpui khaw chhuak Mizo defender Joe Zoherliana hian Mizoram chhuahsanin Shillong Lajong FC academy a zawm a, Shillong Premier League-ah pawh Shillong Lajong senior team-ah a khel hman a. Hemi hnuah hian Mizoram lamah kir lehin Mizoram Premier League club Chanmari FC a zawm leh a ni.

Chanmari FC atang hian Indian Super League club FC Pune chu a pan leh a, 2018 kumah khan Aizawl FC chuan an la lut a. November 14, 2018 ah khan Aizawl FC tana a game hmasa ber khelin, hetah hian East Bengal FC chu 3-2 in an hneh a ni.

“Bengaluru FC in min lo duh ve a, min la lut ve ta hial mai hi awih harsa ka ti a, a lawmawm ka ti hle a. Indian Super League club thenkhat hian an club zawm turin min sawm ve hlawm a, chutiang kara Bengaluru FC zawm theihna hun tha hi bawhpelh chi a ni lo,” tiin Joe Zoherliana chuan a sawi.

Kum 21-a upa Zoherliana chuan, “Tunah hian hma sawn belh zel duhna a lian a, ka thlen chin aia sanga awm duhnain min tuam vel a, chona thar hmachhawn theih hi ka duhthusam a ni,” a ti.

2020 AFC U23 Championship qualifying-a India U23 squad zinga tel Wungngayam Muirang pawhin India rama defender tha ber berte zinga khelh theihna hun a nei chu lawmawm a tih thu sawiin, theihtawp chhuaha hma sawn zel a tum thu a sawi ve bawk a ni.

Mandar Tamhane, Bengaluru FC CEO chuan, “Player la upa lo tak mai pahnih, Joe leh Muirang te kan la lut thei hi lawmawm kan ti hle a, dinhmun sang bera min dinpui thei tur an ni tih kan hre chiang a ni,” tiin a sawi a ni.