Tun Pathianni zing lo awm turah hian Bellator MMA fight a chhuak leh dawn a, India ram atang chuan Dsport channel kaltlangin zing dar 6:30 am atangin a en theih ang. Main event-ah Bellator Light Heavyweight Champion Ryan Bader leh Strikeforce light heavyweight champion hlui Muhammed "King Mo" Lawal-a te chu an innuai dawn a, co-main event-ah UFC welterweight title challenger hlui John Fitch leh Bellator fighter rothap tak Paul Daley-a te an intum dawn bawk a ni.
"Bellator Heavyweight champion ka ni dawn-Ryan Bader
Bellator light heavyweight champion Ryan Bader-a chuan heavyweight grand prix tournament khelh mekah chuan hnehna a chang tur thu uar takin a sawi a, a ruala heavyweight leh light heavyweight title a kawl tur thu a sawi tel bawk. Bellator Heavyweight Grand Prix hian ngaihven a hlawh hle a, fighter tawnhriat tha tak tak inbeihna a ni satliah lo, Pride Heavyweight Champion hlui leh MMA fighter piang tawh zinga tha bera ngaih Fedor Emelianenko a tel avang te pawh hian ngaihven a hlawh zual a tih theih awm e. Heavyweight grand prix tournament-ah hian Ryan Bader-a chuan heavyweight champion nih a tum hle a, putar rual laka tlawm a tum loh thu uar takin a sawi mai bakah a tawnhriat tawh leh a thiamna hmangin hnehna a chang ngei dawn niin a sawi.
Heavyweight Champion thar nih an tum dun hle
Heavyweight Grand Prix tournament-ah hian Chael Sonnen, Fedor, Matt Mitrione-a te chuan an tumpuite an hneh theuh tawh a, Bader leh King Mo-a te inbeihna-a chak zawk hian Matt Mitrione-a an hmachhawn ang. UFC light heavyweight title challenger hlui Ryan Bader-a leh King Mo-a te inbei tur hi a nep thei lo. MMA fighter tha pahnih inbeihna lo awm tur hi hmaih phal chi a ni dawn em ni? Bellator Champion Ryan Bader-a tan fiahna hautak a ni dawn a, MMA fans tan phei chuan hei aia fight hmuhnawm tur hi a tam vak bik lovang.
Fight card
Weight Heavyweight
Ryan Bader vs. Muhammed Lawal
Welterweight
Jon Fitch vs. Paul Daley
Heavyweight
Cheick Kongo vs. Javy Ayala
Lightweight
Adam Piccolotti vs. Carrington Banks
Featherweight
Aaron Pico vs. Lee Morrison