Belgium coach thar tur Van Gaal?

03rd December 2022, 01:12PM

Louis van Gaal chuan Qatar World Cup zawhah Netherlands coach hna a chawlhsan dawn chiang a, Belgium nen sawi zawm an ni chhunzawm leh nghal.

Belgium coach Roberto Martinez chuan kum 6 chhung a lo chelh tawh Belgium coach hna chu a chhuahsan tur thu a sawi chiang tawh a, World Cup zawh hnuh khan Belgium coach a nih tawh loh thu a sawi a nih kha. Red Devils hi Van Gaal hian a enkawl ngei dawn niin a lang mek.

"Belgium hi ram nuam tak a ni. An tla hi a mak khawp mai, a mi mal ang zawnga thlirin player tha tak tak vek an ni a. An harsatna tawh hi team chhung lam a nih hmel.

"An training session hi ka la chhim lo a, an match zawng zawng pawh ka en lo. An match hnuhnung ber ka en kha chuan chak thei an ni a, tling thei an ni,"tiin Van Gaal chuan kumin Wrold Cup-a Belgium tlak danchungchang a sawi.

Belgium coach hna thawh a tum leh tum loh zawhna chu, "Ka nupui an hmin hmasak  a ngai ang.  Tak takah, thuthlukna keimaha siam turin zalenna ka nei, mahse ka insawn miah lohna tur ram a awm ve a, ka nupui pawh chuti ang tho chu a ni. Ka insawn chu ka ring chiah lo, mahse duhthlan tur  a lo awm ve hrim hrim kha a tha.

"Tunah rih hi chuan Dutch team-ah ka awm a, tuna kan duh ber chu champion nih a ni. World Champion kan nih chuan sawmna a awm ngei ngei dawn tih ka chiang a, mahse tunah champion erawh kan la ni si lo," tiin Van Gaal chuan a chhang.

Tuna a hna tul hmasa chu Netherlands last 8-a hruai thlen a ni. Mahse an tumpui tur USA hi a hmu hniam lem lo khawp mai.

Van Gaal chuan, "USA hi team tha tak an ni a, team tha ber an ni hial mai thei. Mahse hneh theih loh a awm lo," tiin last 16-a USA nen an inhmachhawn tur chungchang a sawi bawk.

Copyright © inkhel.com 2024. All rights reserved.