Bayern Munich chuan Tottenham atangin Harry Kane an la lut fel ta a, English striker man hi €100million (£86.4m, $110m) vel nia report a ni.
Zirtawpni khan kum 30 mi England captain hian Bayern Munich-ah medical a nei fel a, kum 4 chhung atan Bundesliga champions tan contract ziakin, Bayern Munich-ah hian jersey no. 9 a ha dawn a ni.
"FC Bayern mi leh sa ka ni thei hi ka lawm khawp mai. Bayern hi khawvela club lian ber zinga mi a ni a, level sang zawka ka theihna pho chhuah hi ka chak zia ka lo sawi fo tawh thin.
"He club hian chak duhna thinlung a nei a, an zinga ka tel thei hi ka hlim hle mai," tiin Harry Kane chuan Bayern Munich a zawm hlimin a sawi.
FC Bayern president Herbert Hainer chuan Kane a dah sang hle, Bayern Munich mai ni lo, Bundesliga pawh hian Kane hi a larpui a rin thu a sawi chhuak.
"Player theihna sang bik kan la lut thei a, kan hlim hle. Ani la lut tur hian theihtawp kan chhuah a, kan tangrual em em bawk.
"Harry Kane hi FC Bayern chauhin kan chhawr dawn lo, Bundesliga tana player pawimawh tak a ni dawn a ni," tiin Herbert Hainer chuan a sawi.
FC Bayern CEO Jan-Christian Dreesen chuan, "Buaipui chhung a va rei ngat ngat ve le, mahse hetia Harry Kane kan han la thei chiah hi chu kan hlim kher mai.
"Kane hi a hma pawha kan player duhthusam a ni a, kan club khelh dan leh a mizia hrim hrim te hi kan player ni tura duan hrim hrim niin a lang.
"World Class centre forward te hi FC Bayern tan an lo tangkai em em tawh thin, Harry Kane hian kan khelh dan phung kan chhunzawm theih nan min rawn belh ta a, kan lawm kher mai," tiin a sawi ve bawk.
Inrinni khan Harry Kane chuan Tottenham supporter te hrehawm ti tak chungin a thlah a, "Tottenham fan te hnena ka chhuah tur thu ka sawi tur hi hrehawm ka ti khawp mai.
"Kum 20 dawn ka hun lo hman tawhna, kum 11 mi lek ka nih lai atanga kum 30 ka nih thlenga ka awmna ka chhuahsan dawn ta hi hrehawm ka ti.
"Tottenham-ah khan hun ropui tak tak kan lo tawng tawh thin, khang te kha ka theihnghilh tawh ngai lo ang. Ka team-mate lo ni tawh zawng zawng leh ka coach hrawn tawh zawng zawng te, staff zawng zawng leh Spurs chhungkua te, in chungah ka lawm a ni.
"Tottenham supporter te nen inkungkaihna tha tak kan nei thin a, a bik takin in chungah hian ka lawm tak zet a ni. Tottenham tan ka theihna zawng zawng ka chhuah thin a, nangni tihhlim leh inchhuang taka in awm ve theih nan hian ka theihna zawng zawng ka hlan thin a ni," tiin Kane chuan instagram kal tlangin Tottenham a thlah.