Bayern Munich chuan Luis Diaz an hnaih zel a, €75million (£65.6m; $88.1m) an thehchhuak a, hei hi Liverpool chuan an lo pawm mai dawn hnai niin The Athletic chuan a tarlang.

Kar hmasa lam khan Bayern Munich chuan Luis Diaz manah €67.5m (£58.6m; $78.8m) an thehchhuak a, hei hi Liverpool chuan an lo hnar.

AC Milan nen pre-season friendly match an khelh tumin Luis Diaz hi squad-ah a tel ve lo a, Liverpool boss Arne Slot chuan a hma hun tur chungchang an ngaihtuah avangin Diaz a inlan ve loh thu a sawi tawh a nih kha.

"Lucho chungchangah chuan, a hma hun tur chungchang ngaihtuah a ni a, chuvang chuan team-ah a tel ve rih lo.

"Transfer titi leng vak a tam hle, chumi chungchang chu ka sawi thei lo. Training tha takin a nei a, chutih laiin a hma hun tur chungchangah erawh thutlukna kan siam a ngai a ni.

"Player dang te ka biak ang thoin Diaz hi ka titipui tawh a, ka lo sawi tawh ang khan, Lucho hi kan hnenah training tha takin a nei a, a tana tha tur ber kan ngaihtuah ang a, thutlukna kan siam dawn a ni, tun dinhmunah erawh engmah sawi lawk theih ka nei lo a ni," tiin Liverpool boss Arne Slot chuan Diaz-a chungchang a sawi.

Liverpool hian Frankfurt atangin Hugo Ekitike an la lut tawh a, a manah £69million ($93.4m) bakah add ons £10m an thehchhuak a, Liverpool hian Newcastle United atanga Alexander Isak lak luh an la tum tho nia report a ni.

Tin, Liverpool hian Darwin Nunez hralh an tum nia tarlan a ni bawk a, Harvey Elliott pawhin a hma hun tur chungchang a ngaihtuah dawn thu a sawi ve tawh bawk.

Diogo Jota a awm tak lohah chuan Liverpool hian an hmatawng thawmthat an tum hle a, hetih lai hian an neihsa te erawh an hum thei bik dawn lo niin a lang a, Luis Diaz hian Bayern Munich pan a chak nia tarlan a ni a, indawrna a kal chho mek a, Bayern Munich hian an lei thei mai dawn niin a lang ta mek e.