Bayern Munich forward thar Mane

22nd June 2022, 05:06PM

Senegal forward Sadio Mane chuan Liverpool chhuahsanin Bundesliga champion Bayern Munich a zawm fel a, kum thum daih contract a ziak.

Bayern hian Mane manah Liverpool hi euro maktaduai 32 an pe phawt a, a inkhelh tam dana zirin euro maktaduai 6 an pek belh a nga, a khelh that dan a zirin euro maktaduai 3 dang an chawi belh leh thei bawk dawn a ni.

Liverpool hian Mane chungchangah Bayern hi vawi hnih an hnar hnuah, club hnih te an inrem thei ta a, Mane hian Bayern a zawm hma hian Liverpool-ah kum khat dang daih chiah contract a nei tawh a ni.

Kum 30 mi Mane chuan, “He chona hmachhawn hi ka tan a hun tak a ni a, he club lian tak hian min ngaihven hle a, chuvang chuan a tir atang khan ka pan duh tih ka chiang a ni,” tiin Bayern a zawm chungchang a sawi.

Kum 2016 khan Southampton chhuahsanin, Mane hian Liverpool a pan a, Liverpool hian a manah pound maktaduai 34 an seng.

Liverpool-a a awm chhungin Mane hian game 269 khelin, goal 120 a khung bakah assist vawi 48 a nei a, season liamta khan competition hrang hrangah Reds tan hian goal 23 a khung.

Anfield-a kum ruk a awm chhungin, Mane hian Premier League, Champions League, FIFA Club World Cup, UEFA Super League, FA Cup leh Carabao Cup te a chawi hman vek a ni.

Copyright © inkhel.com 2022. All rights reserved.