Tukin khan Bayern Munich chuan an coach Julian Nagelsmann an ban nia report a ni a, a thlak nan German club hian Chelsea boss hlui Thomas Tuchel an la leh nghal nia report a ni bawk.

Bayern Munich lam chuan Julian Nagelsmann an ban chungchang leh an coach thar chungchang hi official-a thuchhuah engmah an la nei lo. German lam chanchinbu te chuan Bayern Munich-in an coach an ban chungchang hi an chhuah nasa hle.

Tin, Thomas Tuchel an ruai ta tih hi widespread reports lamin an tarlang a, tarlan tawh angin, Bayern Munich chuan official-a thuchhuah engmah an la nei lo a ni.

Weekend liamta khan Leverkusen lakah 2-1 in an tlawm, kumin chhungin Bundesliga-ah vawi 2 an chak lo a, vawi 3 an khingpui an inhnehtawkpui. Borussia Dortmund chuan point 1-in an tlansan ta a ni.

Nagelsmann hian RB Leipzig ropui taka a khelhpui hnuin, kum 2021 April thla khan Bayern Munich chuan an ruai ta a. A season khatnaah Bundesliga title a lakpui a, Champions league quarter final-ah Villarreal an hneh lo.

Tun season Champions League-ah erawh an khel tha hle, an game khelh zawng zawngah hnehna an la chang vek a, goal 21 lai an khung a, goal 2 chiah an la chhuah.

Hetih lai hian Bundesliga-a an duhthusam result an hlawhchhuah loh avangin Nagelsmann hi an ban ta nia report a ni.

Thomas Tuchel an ruai nia thu thang hi a dik a nih chuan, international break zawha league match hmasa berah, Tuchel hian a club hlui Dortmund a hmachhawn thei dawn a ni.

Dortmund coach hlui hian PSG leh Chelsea a lo enkawl tawh a, Chelsea chu UCL a chawipui hnuin tun season-ah bul a tan tha lo a, Chelsea neitu thar ten an ban a, a aiah Graham Potter an ruai ta a nih kha.