Bayern Munich chuan Chelsea forward Kai Havertz an duh a, nipui bazar inhawn hunah Bayern hian German forward hi an dawr dawn niin chanchinbu mite chuan an ziak.

Bayern hian kar hmasa khan Julian Nagelsmann an ban hnuah, Chelsea manager hlui Thomas Tuchel an lalut a, Tuchel hian Havertz hi Bayern-a thawhpui leh a duh nia sawi a ni.

Bayern hian Havertz hi Bayer Leverkusen-a a awm lai atangin an lo en thlithlai tawha, Chelsea-in kum 2020-a euro maktaduai 80 senga an lei pawh khan Bayern hian lakluh an lo tum tawh niin chanchinbu mite chuan an tarlang.

Bayern forward Thomas Muller chuan kumin September thlaah kum 34 a tling tawh dawn a, hemi avang hian Bayern hian forward thar an mamawh a, kum 23 mi Havertz hi Muller thlaktu atan an hual niin a lang.

Chelsea hian player lakluh nan sum an sen hnem em avangin, kumin nipuiah player an hralh chhuah ve nual a ngai dawn a, Havertz hi a phu tawkin Bayern hian an dawr a nih chuan, Chelsea hian a chhuah an phalsak mai lovang tih a sawi theih loh.

Havertz bakah hian Chelsea midfielder Mason Mount pawh Tuchel chuan Bayern-a lakluh an duh nia sawi a ni bawka, Mount hian Chelsea-ah season khat dang bak contract a nei tawh lova, Chelsea hian contract thar chungchangah inremna an neihpui theih loh chuan kumin nipuia hralh an tum nia sawi a ni.