Bayern Munich chuan an goalkeeper Manuel Neuer chu Thawhtanni khan contract thar an ziahpui a, Neuer-a contract thar hian kum 2024 June thla thleng a daih.

Contract thar a ziah hma hian Neuer hian Bayern-ah hian season khat dang contract a la nei a, Bayern hian Neuer-a contract hi kum khat dangin an pawhsei sak a ni.

Neuer chuan, “FC Bayern-a ka zinkawngah hian ka lung a awi em em a, season tharah pawh title zawng zawng chawi thei tur khawpa tha team kan nei leh ngei ang. Goalkeeper leh captain ka nihna angin kan tumram kan thlen theih nana mi tangkai tak nih ka duh a, kan title record chhawm nun zel pah a, DFB Cup leh Champions League te pawh chawi leh ka duh a ni,” tiin contract thar a ziah chungchang a sawi.

Bayern hian kum 36 mi Neuer hi kum 2011 khan Schalke atangin an lalut a, Bayern tan German goalkeeper hian game 472 khel tawhin, Bundesliga title 10 a lak tawh bakah, Champions League nomawi pahnih leh DFB-Pokal nomawi panga a chawi tawh a ni.

Bayern keeper hlui, tuna an CEO ni mek Oliver Kahn chuan, “Manuel Neuer hi khawvela goalkeeper tha ber a ni a, chu chu kum tam tak chhung a lan tir tawh a, hun rei tak tha taka a khel reng thei hi a ropui hle. A contract kan pawtsei thei hi kan lawm a, Manuel hi FC Bayern history-a mi pawimawh tak a ni,” tiin a sawi ve bawk.