Barcelona chuan an tum ang ngeiin Dutch forward Memphis Depay chu an lalut thei ta a, July thla ni 1 atangin Depay hi Barcelona player a ni ang.

Depay hian Lyon-ah tun thla ral rual hian a contract a hmang zo dawna, a contract a hman zawh rual hian free-agent in Barcelona a zawm nghal dawn a ni.

Depay hi nikum lam pawh khan Barcelona-in Dutch manager Ronald Koeman an rawih tirhin lakluh an lo tum tawha, mahse an hlawhchham. Tun nipuiah Barcelona chuan Depay hi dawr lehin, a contract hmang zo tur a ni chiah bawk nen free transfer-in an la thei ta a ni.

Barcelona hian Depay hi kum 2023 June thla thleng daih contract an ziahpuia, kum 27 mi hi tun nipuia Barcelona player thar pathumna niin, Barcelona hian Sergio Aguero leh Eric Garcia-te chuan free transfer ve ve in an lo lalut tawh bawk.

Depay hian tun kar khan Euro press conference-ah Barcelona a zawm tur thu hi a sawi thawi tawha, “Tu pawhin Barcelona kan inbiak reng tawh tih in hre ve ka, Ronald Koeman-a hnuaia khelh ka duha, tunah chuan kan nghak deuh tawp riha, chanchin thar a awm thuai dawn a ni,” a lo ti tawh.

Depay hian kum 2017 khan Manchester United chhuahsanin, French club Lyon ho a zawma, tha taka Lyon tan a khelh hnuah Netherlands lama a lo hrawn tawh Koeman nen an thawk dun leh dawna, kum hnih daih contract Barcelona-ah a ziak ta bawk a ni.