Barcelona chuan Neymar leh Antoine Griezmann te chu an pahniha lak luh an tum dawn niin thu a thang mek.
Spain rama chanchinbu lar pakhat Sport chuan Barcelona chu Europe khawmualpui lama invawrh tumin ruahmanna an siam mek niin an tarlang a. Tun season liam taah khan UEFA Champions League semi final-ah Liverpool an hneh lo a, season tharah chuan champion thei tura tan lak an rilruk niin an tarlang bawk.
La Liga champion Barcelona hian striker tha tak Neymar leh Antoine Griezmann te pahnih lak luh chu thil khirh tak mai a ni tih an hre chiang hle a. Amaherawhchu, tumna a awm chuang kawng a awm tih hriain, an thil duh hi tihpuitlin dan kawng dap an tum niin an sawi.
Paris Saint-Germain chuan kum hnih kaltaah khan Brazilian star hi Barcelona atangin khawvela footballer man to ber ni turin £196 million zetin an lei a. Barca hian an player hlui hi lak let leh an duh hle a, a man a tlawm dawn lo tih an hriat avangin pawisa eng emaw zat leh an player neih thenkhat nen inthleng theih dan an zawng dawn a ni.
Spanish club lian Barcelona chuan PSG chu Neymar hi £89.3 million vela lei an dil ang a, Philippe Coutinho, Ivan Rakitic leh Samuel Umtiti te zinga tu emaw ber chu Paris khawpuia kal teltir an rilruk bawk a. Antoine Griezmann pawh lak theih dan kawng a awm thei dawn a, July 1 hian a release clause pawh £178.5 million atangin £107 million ah a tla dawn a, hemi huna chet lak tan an tum niin an sawi.
Club president Josep Maria Bartolomeu chuan player pahnih te lak hi a rawt chhuak a, sum pawh theh chhuah a inhuam thu a sawi tawh a. Champions League semi final-a Liverpool an inlehthaltir kha an la na bawk a, season tharah chuan champion ngei an tum hle a ni.
Neymar leh Antoine Griezmann te hi Barcelona hian an la thei ta ve ve a nih ngat chuan khawvela club zingah chuan tlar hmaa ding tur nei tha ber an ni thei dawn a. Lionel Messi leh Suarez te an nei sa tawh bawk si a, manager tan duh thlan thiam erawh a harsa ve foin a rinawm.
Antoine Griezmann chuan Atletico Madrid chhuahsan a duh thu a sawi tawh a, Neymar pawhin Paris Saint-Germain ah chuan awm zui a duh tawh loh thu a sawi bawk a, Barcelona tan chuan beihpui thlak a remchan phah viau dawn niin a lang.