Barcelona Joan Laporta chuan centre forward thar lak a duh a, Manchester City striker Erling Haaland chu a player duh ber a nih thu El Nacional chuan a tarlang.

Kum 37 mi Robert Lewandowski chuan Barcelona-ah contract thar a ziak tawh dawn lo a, tun season bak Catalan Club tan a khel tawh dawn lo. Hetih lai hian Lewandowski a la tangkai hle a, tun season-ah pawh Barcelona goal khung khawl a la ni chho zel dawn niin a lang.

Kum 37 mi a lo ni ve tawh a, Barcelona chuan contract thar zawrh an tum tawh bawk lo a, Hansi Flick pawhin tun season-ah hi chuan rinrawla hman a tum vak tawh lo nia report a ni a. Lewandowski aiah player naupang zawk Ferran Torres chu Barcelona innghahna a ni chho mek. 

Polish striker hi Flick chuan bench-ah a dah hnem a, chutih laiin hun pawimawhah chuan a la khelhtir chho zel tho a, a upat deuh tawh avangin 90 mins khel pap pap turin a tlin tawh lo a ni ber mai.

Barcelona chuan nakkum nipui bazar inhawn hun atan striker an dap chho mek, Julian Alvarez pawh an ngaihven zingah a tel nia report a ni. Laporta chuan Manchester City striker Erling Haaland chu a player awh ber a nih thu El Nacional chuan a tarlang a, hetih lai hian Barca hian Norway striker hi an la thei ang em?

Sum lama harsatna an la tawh chhoh mek zel avangin Barcelona tan chuan Haaland lak hi a har maithei a ni. Mahse Laporta chuan sum tam tak thawhchhuah dan a dap thiam dawn nia ngaih a ni a, Haaland hi an la lut thei a nih chuan, hun rei tak chhung Barcelona innghahna a ni chho thei dawn.

Real Madrid emaw Barcelona emaw hian Haaland hi an ngaihven chho dawn chiang niin a lang. Tunlai striker zingah chuan Haaland aia goal khung thei an awm chuang lo. A palian a, tharum a ngah a, a che rang tel bawk a, goal a khung thei em em bawk.

Ram leh club tan Haaland hian goal khung a chawlhsan thei lo. Manchester City goal khung khawl hian Etihad Stadium chhuahsan a duh kher lo maithei. Chutihlaiin club lian zawk zawmna hun remchang a hmu a nih chuan, a chhuak duh thut maithei bawk a ni.