Brazilian forward Neymar chuan Barcelona chhuahsan tumna a neih loh thu leh Barcelona chhuahsan tur anga ala insuangtuah ngai loh thu a sawi. Kum 24-a upa Neymar hi chhuak tur anga sawi ni fo mahse kumin June thla khan Barca a cham turin kum nga daih contract thar a ziak a, Camp Nou-ah 2021 thleng a cham ang.
"Barca chhuahsan tumna ka nei lem lo. He hmun chhuahsan tur hian ka la insuangtuah chhin ngai lo hrim hrim. Team tana player pawimawh niin ka inhria a, tun aia nasa zawk hian tangkai zel ka tum," tiin Barcelona chhuahsan tumna a neih loh thu a sawi.
Neymar agent Wagner Ribeiro chuan PSG-in khawvela footballer hlawh hnem ber ni turin Neymar lakluh an tum niin a sawi a, hemi chungchang hi Nyemar zawh a ni a, Brazil captain hian a pah lem lo.
"Engmah sawi chian duh ka nei lo, a chhan chu hlawh chungchang hi sawilan ka duh lo. Team tam tak nen kan inbia a, nimahsela ka in anga ka ngaih Barca a cham chhunzawm ka thlang a ni," tiin.