La Liga lamah Real Madrid tlansanna hun tha tak an neih laiin, Barcelona chu an talbuai ve tlat mai. Inrinni zan khan Las Palmas an mikhual a, mikhual team-in 2-1 in hnehna an chang.

Tun season La Liga-a an game hnuhnung 3-ah Barcelona chuan chak ni hmel an hmu ta lo. Vawi hnih an tlawm a, vawi khat an khingpui an inhnehtawkpui. Real Sociedad lakah si khat faiin an tlawm, Celta Vigo nen 2-2 in an inhnehtawk a, inrinni zan khan 2-1 in Las Palmas an hneh lo bawk.

Las Palmas an hneh loh tum hian Barcelona tan Raphinha chuan goal a khung ve leh a, minute 49-a Ramirez goal chu minute 61-ah Raphinha chuan a rul. Hemi hnu rei lo te minute 67-ah Silva chuan Las Palmas chakna goal a khung zui ta a ni.

Chak zo lo mah se Barcelona chu La Liga hmahruaitu an la ni chhunzawm zel. Khelh 15 atangin point 34 an nei a, an hnuai chiahah hian Atletico Madrid awmin, anni hian khelh 15 atangin point 32 an hlawhchhuak a, point 2 chiahin Barcelona hi an phak lo.

Real Madrid chu pathumnaah an awm a, anni hi game 2-in an khel tlem. Khelh 13 atangin point 30 an nei a, point 2-a Barcelona lehpelh theihna hun tha tak Real Madrid hian an nei mek.