Thil buaithlak tak pakhat a awm tlat mai. Chumi hmain Rashford-a transfer chungchang han tarlang leh hmasa phawt ila.
Marcus Rashford chuan loan-in Barcelona a pan ta a, club pahnih te an inrem tawh a, medical pawh an nei fel tawh nia report a ni a, he chanchin ziah lai hian an la inphochhuak lo deuh.
Rashford hian Manchester United-ah kar khat chhungin £325,000 vel a hlawh a, Barcelona a pan theih nan hian a hlawh tihhniam a remti a, Barcelona chuan kar khat chhungin £225,000 vel an hlawhtir dawn. A hlawh hi Barcelona lamin an tum vek dawn a, loan fee erawh Catalan club hian an pe dawn lo a ni.
HARSATNA A AWM TLAT MAI
Marcus Rashford hi Barcelona hian an squad-ah an ziak lut thei ang em? La Liga Salary limit avangin Barcelona hian buaina an la tawk chhunzawm zel.
2024-25 season khan Dani Olmo leh Pau Victor te chu season chawhnu lamah an ziak lut thei chauh kha a ni a.
Athletic Club atanga Nico Williams an lak luh theih lohna chhan pawh khan squad-ah an ziah luh theih loh vang a ni.
Barcelona khan Nico Williams-a release clause €58million (£50.3m) pek an inhuam, Williams pawhin Barcelona pan a duh bawk.
Barcelona lamin squad-a an ziak lut thei lo a nih chuan, chhuah leh nghal theihna "Exit clause" kha Williams khan ziah a phut tlat. Mahse Barcelona lamin hei hi an pawm thei ta lo.
Inremna an neih theih tak lohah chuan Nico Williams chuan hun rei zawk atan Athletic Club-ah contract thar a ziak ta zawk a nih kha.
BARCA HIAN PLAYER THAR AN ZIAK LUT THEI DAWN EM?
Barcelona hi an sum lak luh aiin, player leina leh hlawhah sum an seng hnem tlat mai a, La Liga Salary Limit an pel. Tun dinhmunah hi chuan an player thar te an ziak lut thei rih lo.
Player thar ziak lut turin eng nge an tihmakmawh? Player hlawh hnem deuh hlek an hralh a ngai dawn ta a ni.
ENGTIN NGE AN INTHEN FAI ANG?
Hei hi a buaithlak dawn khawp mai. Barcelona hian La Masia chhuak thenkhat chhuahtir an tum mek. La masia chhuak left-back Alex Valle chu Como hnenah €6m-in an hralh tawh a, player naupang Pablo Torre chu Mallorca-ah €5m-in an chhuahtir tawh a, defender Clement Lenglet chu free transfer-in Atletico Madrid-ah a kal a, Ansu Fati pawh loan-in Monaco lamah an kaltir.
Heng an chhuahtir ho hian an harsatna a la sukiang mai lo deuh. Barcelona hian an player hlawh hnem Marc-Andre ter Stegen hi chhuahtir an tum ve mek nia report a ni.
Ani hi inhliam avangin hun rei tak a chawl a, Szczesny leh Joan García an nei tho bawk a, kum 33 mi ter Stegen hi thehchhuah mai an tum nia report a ni.
RASHFORD HI ZIAK LUT THEI LO TA SE?
La Liga-ah Rashford an ziak lut thei lo a nih chuan, La Liga a khel thei lo ang a, chutih laiin Domestic Cup, Copa del Rey leh Champions League te erawh a khel thei thung ang.
Barcelona hian loan-in Rashford hi an chhuahtir leh nghal thei dawn bawk lo a, a hlawh an tum sak reng ang a, chutih laiin La Liga-ah erawh an chhawr thei dawn lo tihna a ni.
ENGTIN NGE NI ZEL DAWN?
Kan hre tawh bik lo. Chutih laiin thil pakhat chu, an ti nek nek a, an fel leh thlup thin. Hetia Barcelona-in Rashford an lak takah chuan, La Liga lama ziak lut thei turin hma an la ngei dawn a, an player hlawh tam pahnih khat tal chu an chhuahtir ngei a rinawm a ni.