Barca in Ramos emaw Firmino emaw lalut se ka ti: Kluivert

24th March 2023, 03:03PM

Barcelona striker hlui Patrick Kluivert chuan, a club hlui Barcelona chuan striker an mamawh nia a hriat thu a sawi a, Benfica striker Goncalo Ramos emaw Liverpool striker Roberto Firmino emaw lalut turin Barcelona chu a duh thu a sawi.

Barcelona hian nikum nipui bazar lai khan Bayern Munich atangin Polish striker Roberto Lewandowski an lalut a, mahse Lewandowski hi kumina kum 35 tling tur a nih avangin Barcelona in striker thar an mamawh leh thuai dawn tih a chiang.

European competition lamah Barcelona hi tla fel tawh mah se, La Liga-ah erawh an champion a rinawm hle a, season kal mekah Lewandowski hian Catalan club tan hian goal 25 a thun tawh.

Dutch footballer hlui Kluivert chuan Barcelona tana a player duh chungchang zawhna chhangin, “Financial Fair Play hi ngaihthah chi a ni lova, mahse ka player lakluh duh ka sawi dawn a nih chuan striker a ni ngei ang.

“Lewandowski a awm loh hnuah centre-forward an mamawh dawn chianga, Goncalo Ramos hi ka duh em em a, Portugal tan a khel tha thin hle a, chutiang chiah chuan Benfica tan pawh a tha. Firmino pawh Barcelona tana tha tur niin ka hria. Barcelona thawmthat nan chuan striker lakluh a ngai a, midang zawng hi an chhuak lo bawk a nih chuan a tawk viau ang,” tiin a sawi.

Copyright © inkhel.com 2024. All rights reserved.