Euro-a che tha tak Nico Williams chu Barcelona-in lak tum viau mah se, Athletic Bilbao lama a cham chhunzawm zel a rinawm ta zawk.

Kum 22 mi hian nikum December thla lawk khan contract thar a ziak a, kum 2027 thleng atan ziakin, hetah hian hun rei zawk atana inrawih theihna ziah tel a ni bawk.

Barcelona chuan Nico Williams hi lak tumin hma an la a, Euro 2024-a Spain champion puitu hian release clause €55million vel a nei nia report a ni. Barcelona hian sum lama harsatna an nei avangin Williams-a man hi theihtawpa nawr hniam an tum, hetah hian Athletic Bilbao chu a lungawi thei ta lo niin The Athletic chuan a tarlang.

Williams hian a naupan lai atanga a club-ah hian cham chhunzawm zel a hnial lo nia report a ni a, Athletic club hian Europa League an khel dawn a, Europa League final hi San Mames Stadium-ah khelh a ni dawn bawk.

Barcelona hian Euro-a chetha tak Dani Olmo pawh lak tumin hma la mah se, Olmo hian RB Leipzig-ah release clause €60million vel a nei nia report a ni a, Barcelona tan chuan lei ngam niin a lang lo. Hei vang hian Catalan Club hian khaw dang an hawi mai a rinawm ta a ni.

Athletic president Jon Uriarte chuan, "Athletic Club hi sum lamah leh fans lamah pawh kan ngelnghet em em a, kan player tha te Nico Williams telin chelh thei tura team tha kan ni e," tiin a sawi chhuak nghe nghe.

Williams hi Athletic Club Academy chhuak a ni a, kum 2020 khan first team tan inlan tanin, senior-ah game 122 a khel ve tawh. Season liamta La Liga-ah khan game 31 atangin goal 5 a khung a, assist vawi 11 a nei bawk.