Barcelona president Joan Laporta chuan January thla-a thlasik bazar a inhawn hunah, midfielder lakluh tur an dap dawn tih a sawi.

Spain tana a fehchhuahnaah Barcelona midfielder Gavi chu a inhliam a, ACL injury a nih avangin Spanish midfielder hi tun season-ah a inkhel thei tawh dawn lo. Kum 19 mi hi Barcelona midfielder pawimawh a ni a, tun season-a a inkhelh thei tawh dawn loh avangin Laporta chuan thlasik bazar inhawn hunah loan-a lakluh tur midfielder an zawng dawn tih a sawi.

Laporta chuan, “Financial Fair Play dan chhunga kan awm theih nana kan insiam rem theih chuan, Gavi-a hmunruak hnawhkhattu tur hi lakluh kan tum. Season kal lai zawh thleng atana loan tur a ni dawn a, a hma pawhin hetiang hian Edgar Davids kan lo lak tawh kha. Kumin hi a ral hmain player pahnih vel kan lakluh theih nan kan insiam rem hman ka beisei,” tiin a sawi.

Sum lama harsatna an tawh avangin Barcelona hi La Liga chuan an wage budget an tih tlem sak a, player an lalut duh a nih chuan an kawl lai an chhuah tir ve a ngaih a rinawm. Barcelona hian January thlaah player thar an nei dawn a, kum 18 mi Vitor Roque chu euro maktaduai 35 in an lalut dawn a ni.