La Liga inkhelah Barcelona chuan Camp Nou-ah Granada an lo mikhuala, 2-1 in beisei loh zawk mikhual lam Granada hian hnehna changin, Barca-in point thum pawimawh tak an hloh.
Barcelona tan an captain Lionel Messi chuan goal a khunga, Granada tan hian Darwin Machis leh Jorge Molina-te chuan goal khat ve ve an khung ve bawk.
Barcelona hi chak se chuan, La Liga hmahruai thei tur an ni a, mahse point engzat mah an hlawhchhuak ta lova, hmahruai theihna huntha tak bawhpelhin, an champion loh phah thei a ni.
Khelh 33-ah Barca hian point 71 hlawhchhuak tawhin, pathumnaah an awma, an chung chiaha awm Real Madrid nen an point inangin, league hmahruaitu Atletico Madrid chu point 2-in an pha lova, an pathum hian an khelh zat a inang vek.
Barcelona 2-1 Granada
(Messi 23’) (Machis 63’, Molina 79’)
Player Ratings
Barcelona hian hma an hruai hmasa a, 20mins chuang hret khelh a nihin goal an khung. Antoine Griezmann chuan Messi chu ball tha tak a pe a, Messi hian tihsual nei hauh lovin goal-ah a lo chhuih luta, 1-0 a ni.
Half time hma deuhin Barca-in goal khung belh theihna hun tha zet an nei a, Messi leh Granada goalkeeper Aaron Escandell te chu an pahnih chiahin an inhmachhawna, Messi hi goal khung ngei tura ngaih a nih laiin, Messi hian goal a khung thei lova, chance tha tak a hlah.
1-0 hian first half a tawpa, darkar khat chuang deuh hret khelh a nihin Barca hian an si phurh an suta, rin loh tak maiin Machis chuan goal a rawn khung deuh thut a, 1-1 a ni. Granada-in an si phurh an sut hnu lawk hian Barca manager Ronald Koeman chu a thinrimin referee a an khuma, red card pek a ni.
80mins an khel vel dawn chiahin tihin bet zawk Granada hian hma an hruaia, veilam atanga Barca box-a ball vawrh luh chu Molina chuan goal-ah a lo tauh luta, 2-1 niin, Molina goal hi Granada chuan an chakpui ta a ni.
Barca hi an league game hnuhnung 17-ah vawi 15 chakin, champion-na chance nei tha ber pawh rawn ni leh hman mahse, minute 16 chhungin Granada lakah goal hnih an chhuaha, an tuar ta a ni.
Barca-in Granada lakah hian inkhel an thunun hle a, ball pawh an chang tam hle. Barca hian ball possession 82% lai an neia, shot 16 neiin, Granada erawh hian shot 5 chiah an neia, an shot on target neih chhun pahnih chu goal-ah an chan tir ve ve a ni.