Kum khat lek a cham hnuin Jules Kounde chuan Barcelona chhuahsan a duh thut a, Barca chu an hrilhhai hle niin Spanish media te chuan an tarlang tlat mai.
First team-a an ziah luh theih hnuah France international hi Xavi chuan a chhawr tangkai hle a, La Liga title an lak theihna kawngah pawh tha a thawh hlawk hle a ni.
Spain thuchhuah thenkhat tarlan danin, Kounde chuan a khelh thanna centre-back ni lo; right-back-a khelh tir a ni chu nuam a ti chiah lo a, chuvang chuan a duhna hmuna a khelh theih nan club chhuahsan dan kawng a zawng.
Barca pawh an hrilhhai ang reng hle nia report a ni a, Kounde chungah an lawm bik vak lo niin an tarlang bawk. Barca chu an sum dinhmun a la tha vak lo a, tun nipui bazar inhawn huna player thar lak an duh leh a nih chuan, an player thenkhat an chhuahtir a la ngai leh dawn tho.
Barcelona director Mateu Alemany chu Kounde-a hmahun tur chungchang zawh a ni a, mipui hriat loha an chinfel tur thuin a chhang.
Kounde hian Barca-ah a hlawh hnem em em a, chuvang chuan an hralh dawn a nih chuan, a manah €80m aia tlem an chhiar a rinawm loh. Chhuah duh mah se a tan club dang zawn erawh a harsa deuh maithei a ni.
Thomas Tuchel-a'n a enkawl lai khan Chelsea chuan Kounde hi an hel a, mahse an hlawhtling lo. Newcastle United pawhin Kounde hi an ngaihven ve deuh thin nia report a ni bawk a.
Eng pawh ni se, Kounde hi a lungawi lo a nih pawhin, club chhungkuaah hemi chungchang hi chu an chinfel theih mai a rinawm.