Kum 2022 khan Raphinha chuan Leeds United aṭangin Barcelona a zawm a, Barca-a hun a hman chhung hian chhuah a tum fo thu a sawi chhuak.

Kum 27 mi hian Hansi Flick-a hnuaiah goal 9 a khung tawh a, nilaini Champions League match-a Bayern Munich an hneh ṭum khan hattrick a siam nghe nghe.

Brazil international hian Barca-a a season khatnaah league title a la nghal a, hetih lai hian Barcelona supporter-te chuan amah an zah tawk lo niin a ngai. Catalan club supporter te hian Nico Williams an awt hle, hei vang hian Athletic Club Bilbao player Nico Williams-a hming chu Barca kawrah an chhu kai a, Raphinha jersey-ah ngei mai Nico-a hming an chhu kai.

Raphinha chuan, "Mahni inrintawk lohna te ka nei hial. Keimah leh keimah ka insel a, pressure sang tak ka inpe bawk nen, Barcelona chhuahsan daih te hi ka chak ṭhin a ni," tiin Bayern Munich an hmachhawn hmain a sawi.

Tun season ṭantirah pawh red card a chawi nghal a, a club berin an duh tawh lo niin a inngai hman hial nghe nghe. "Thil chi hrang hrang ka thlir hian, Barcelona hian min hralh an duh niin ka hre ṭhin. Tin, fans lam pawhin chhuak turin min duh niin ka hria.

"Hetiang reng renga hun hman ai chuan Barcelona hi chhuahsan daih ila, hahdam deuha ka khelh theihna tur hmun pan daih ila ka ti ṭhin a ni," tiin Raphinha chuan a sawi bawk.

Bayern Munich an hmachhawn ṭuma a hattrick kha, tun season-a hattrick a siam vawi hnihna a ni a, 7-0 laia Real Valladolid an hneh ṭumin hattrick a siam a, 5-1 a Villarreal an hneh ṭumin goal 2 a khung bawk.

Zanin hian Barcelona chu Santiago Bernabeu-ah an leng lut dawn a, El Clasico-ah hian an chak lo a nih chuan, Real Madrid nen point 27 ve ve an nei thei dawn. Barcelona chuan hma hruai falna hun remchang hi bawhpelh an tum dawn lo a ni.