November ni 29, 2021 (Thawhtanni) hian kum 2021 Ballon d'Or winner puan a ni dawn. Kum dang zawng aiin kumin hian sawisel a hlawh dawn niin a lang.
Jorginho-a'n dawng se, Messi leh Lewandowski ten an phu zawk an ti ang a. Messi-a'n dawng se Euro leh UCL title la thei Jorginho leh goal khung hnem em em Lewandowski-a'n Messi ai chuan an phu zawk an ti ve leh ang a. Lewandowski-a'n dawng se Messi-a'n major title a lak laiin Germany-ah chauh che tha hian a phu lo an ti bawk ang a.
Kumin hian tu pawhin Ballon d'Or dawng se, sawisel a ni dawn hrim hrim niin a lang. An chetthat dan hi a inang lo hlawm a, a then trophy lian an chawi, a then mimal takin an che tha bawk. Ronaldo-a'n han dawng khauh phei selang chuan sawiselna a nasa dawn khawp mai.
2021 Ballon d'Or dawng thei tur football player 30 chhawpchhuah zingah Lionel Messi, Jorginho leh Lewandowski te chu kumin Ballon d'Or dawng thei tur zinga rinkai an ni. Liverpool forward Mohamed Salah leh Real Madrid striker Karim Benzema te pawh an che tha a, vote pawh an hmu nual ngei ang.
Mi tam takin Chelsea midfielder Jorginho hian kumin Ballon d'Or dawn a phu an ti mek a, ani hian Euro 2020-ah Italy a champion pui bakah Champions League-ah Chelsea a champion pui bawk.
Argentine captain Lionel Messi chuan a vawi sarih nan Ballon d'Or a dawng maithei bawk. Ani hian 2021 Copa America-ah Argentina a champion pui a, Barcelona-a a khelh lai khan Copa del Rey a chawi bawk, chance tha tak a nei chiang.
Nikum khan Ballon d'Or sem chu ni selang chuan Polish striker Robert Lewandowski hian an dawng ngei ang le. Ani hian 2020-21 European Golden Shoe dawngin season hmasa khan Bundesliga goal 41 lai a khung a, Bundesliga title a la bawk a nih kha. Tun season-ah pawh goal a khung chhunzawm zel, tun season UCL-ah game 5 atangin goal 9 a khung tawh a, Bundesliga game 13 atangin goal 14 a khung tawh bawk.
Kumin Ballon d'Or dawng thei tur mi 30 chhawpchhuah zingah hian Premier League player 14 an tel a, heng zinga mi 5-te chu Euro 2020 champion team-a tel te an ni. Kumin November ni 29-ah 2021 Ballon d'Or winner puan a ni dawn a ni.
French news magazine France Football chuan kum 1956 atang khan kum khat chhunga footballer chetha ber lawmman an buatsaih a, chu chu Ballon d'Or hi a ni. Football-a mimal lawmman upa ber a ni nghe nghe. Kum 2010 atang khan FIFA World Player of The Year nen thawk hovin FIFA Ballon d'Or tih a ni a, kum 2015 thleng FIFA nen hian thawk hovin kum 2015 atang khan FIFA leh Ballon d'Or hi an inthen leh ta a ni.
Ballon d'Or lamin lawmman dawng tur vote thlak thei an tam bawk nen, winner nih phu ber vote chhuah kawngah FIFA nena an thawh hona kha dik tawk lovin an hria a, Ballon d'Or chuan a hmaa an kal anga kal chhunzawm an thlang leh ta zawk kha a ni a.
Ballon d'Or winner ni hmasa ber chu English player Stanley Matthews a ni a. Kum 1995 thleng khan European Player chiah thlan theih a ni. Chumi hnuah Europe club-a khelte pawh thlan theih an ni leh a, kum 2007 atang khan khawvel puma player tu pawh thlan theih a ni ta a ni.
French magazine editorial staff te chuan nominees mi 30 an thlang chhuak a, heng player 30-te atang hian vote thlak a ni ta thin a ni. Khawvel ram hrang hranga chanchinbu miten vote an nei, ram khat atangin chanchinbumi pakhat zelin vote an thlak thin bawk. Fifa hnuaia ram hrang hrang captain leh coach-te pawhin vote an thlak bawk a ni.
FIFA leh French magazine France Football te thawh ho lai FIFA Ballon d'Or tih a nih lai khan Lionel Messi chuan vawi 4 a dawng hman a, Cristiano Ronaldo khan vawi 2 a dawng hman bawk. Ballon d'Or dawng ngun ber chu Messi niin vawi 6 a dawng tawh a, Ronaldo chuan dawtin vawi 5 a dawng tawh a ni.
FIFA Ballon d'Or a nih hma khan Cristiano leh Messi te hian vawi khat ve ve an dawng a. FIFA leh Ballon d'Or an inthen hnuah Cristiano Ronaldo-a'n vawi 2 dawng tawhin Messi chuan vawi 1 a dawng bawk.
Tun hma atang tawhin hmatawng lam, goal khung thei hote thlan an ni ngun hle. Forward hi an langsar a, goal an khung thin avangin best player thlannaah chuan award dawng hnem ber an ni hial ang.
Ballon d'Or winner nih phu tak tak thlanchhuah kum awm teuh mahse sawisel hlawh kumte pawh a awm ve fo bawk a. Coach leh captain thenkhat hi chuan kum khat chhunga chetha an tih vote ai chuan thiam an tih hrim hrim an vote emaw tih chang a awm bawk thin.
Trophy la hnem hi tehfung ni tho mahse ballon d'or winner te han en hian mimal chetha leh thiam tih an thlang chhuak fo niin a lang a. Hei vang hian a chang chuan sawisel pawh a hlawh thin reng a ni.
Mitin hian thiam tih kan nei vek a, trophy chawi hnem nge? Trophy chawi tam lem lo, mahse mimal statistics tha nge? Player thiam an tih hrim hrim an thlang chhuak? tih hi sawi fak theih a ni hauh lo mai.
Chumi kuma winner ai kha chuan ani kha winner nih a phu zawk fe tih tur vawiin thlengin a la awm a, chutih laiin kum tina an thlan chhuah hi chu mi tam zawk pawm tlan a ni deuh ziah a. Phu leh phu lo chungchang kha chu mimal ngaihdanah dah tawh mai ang u aw.