Ballon d'Or a dawn khan Michael Owen khan eng nge Ballon d'Or tih pawh a lo hre lo chu niin.

Kum 2001 khan Liverpool-a a khelh laiin Owen hian Ballon d'Or a dawng a, kum 2004 khan Real Madrid a zawm a,  Newcastle United, Manchester United leh Stoke City tan te a khel chhunzawm bawk.

Michael Owen chuan, "Gerard Houllier khan min rawn phone a, 'Ballon d'Or i dawng a nia,' tiin min hrilh. Kei chuan, 'Eng nge chu chu boss?' tiin ka chhang nghe nghe.

"Ballon d'Or kha eng award nge a nih ka hre lo alawm. Ka hre ngai lo hrim hrim, British chanchinbumite khan an sawi lang ngai miah lo.

"Real Madrid tan ka khel a, a ropui zia ka hrethiam ve hnuhnawh. British ram chhunga MBE (Member of the Order of the British Empire) ang mai kha a lo ni a, kan hming an lam apiangin he award dawngtu ka nih thu an lam tel ve ta ziah a.

"Ram dangah chuan an lo ngai ropui khawp mai a, kan ramah kha chuan kum 10 emaw vel chhung kha chu kan lo sawi lang ngai lem lo chu niin. Ram dangah chuan an lo ngaisang khawp mai," tiin a sawi.