Brighton manager Fabian Hurzeler chuan Carlos Baleba chhuah loh tur thu chiang takin a sawi a, tun season chu Brighton-ah a cham dawn tih za-a zain a chian thu a sawi chhuak.

Kum 21 mi defensive midfielder hi Manchester United chuan an ngaihven a, lak theih dan an dap, mahse Brighton lam chuan hralh an tum loh thu a lo hrilh chiang.

Hetih lai hian United chuan Baleba hi an mamawh ngang mai. Tun season-ah game 3 an khel tawh a, vawi 2 an tlawm a, vawi 1 an khingpui an inhnehtawkpui.

Garnacho chu Chelsea chuan an lei dawn niin a lang mek a, Rasmus Hojlund pawh United hian an thehchhuah theih an inring. Hetia pawisa an lak luh theih chuan, man to deuh pawh nise, Baleba hi lak tuma hma an lak leh ring an tam hle.

Kum 2023 khan Baleba hian Lille aṭangin Brighton a pan a, Brighton tan game 80 a khel tling ve tawh.

Cameroon international hi a chhuah dawn leh dawn loh chungchang an zawhnaah Brighton manager Fabian Hurzeler chuan, "Chhuak dawn lo e, 100% aia sangin a chhuak dawn lo tih hi ka chiang a ni. Sum tam tak rawn thehchhuak mah se, tun season chu a chhuak lo ang," tiin a chhang.

Tun nipui bazarah Brighton hian player thar 6 an la tawh a, defender Maxim de Cuyper chu Club Brugge aṭangin £17.5m-in an lei a, defender tho Olivier Boscagli pawh PSV Eindhoven aṭangin free transfer-in an la lut. Tin, Diego Coppola chu Hellas Verona aṭangin an la lut a, a man erawh puan zar a ni lo.

Midfielder Tom Watson chu Sunderland aṭangin £10m-in an lei a, winger Yoon Do-young chu Daejeon Hana Citizen aṭangin an la lut a, forward Charalampos Kostoulas chu Olympiakos atangin £29.8m-in an lei bawk.

"Kan bazar zo thawkhatin ka inhria, a chang hi chuan hetiang sawichhuah nulh nulh hi a finthlak loh a, chutih laiin tuna ka squad neihah hian ka hlim em em a ni," tiin Hurzeler chuan a sawi bawk.