Bale leh Cardiff an inbia

23rd June 2022, 03:06PM

Tun thla ral ruala free agent ni mai tawh tur Gareth Bale chu Welsh club Cardiff City chuan lakluh an tum mek a, Bale-a agent-te leh Cardiff te hi an inbe mek tih BBC chuan a tarlang.

Kum 32 mi hian Real Madrid-ah tun thla daih bak contract a nei tawh lova, Bale hian a chhuah tur thu a sawi tawh a, Real Madrid pawhin Bale a chhuak dawn tih hi an puang tawh bawk.

Welsh forward hian kum 1958 hnua a vawi khat nan, Wales chu World Cup khel turin a inpet tlin pui a, World Cup atana a inpuahchah theih nan Bale hian Cardiff-a luh hi a hreh lo nia sawi a ni.

Tun dinhmunah eng mah tihfel la awm lo mah se, BBC Sport Wales chuan Bale-a agent te leh Cardiff chairman Mehmet Dalman te chu tun kar khan an inhmu tih a tarlang.

Bale lalut duh hi club dang eng emaw zat an awm nia tarlan a ni a, Major League Soccer club thenkhat leh, a club hlui Tottenham te chuan Bale hi an ngaihven hle ni sawi a ni.

Bale hian Real Madrid-ah hian kar khatah pound 600,000 a hlawh mek a, hei hi Cardiff squad pumpui hlawh zat ai pawhin a tam zawk a ni.

Copyright © inkhel.com 2022. All rights reserved.