Manchester United manager Ole Gunnar Solskjaer chuan an left-back Alex Telles chu a inhliam avangin August thla pum a chawlh a ngai dawn tih a sawi.

Kar hmasa khan Brazilian defender Telles hi pre-season training an neihnaah a inhliama, an tirah rei lutuk lo chawl tura ngaih a nih laiin, rin aiin a chawlh rei a ngai dawn a ni.

Telles hian season bul a tan ve thei dawn lova, United tan Premier League game hmasa pathum khel thei dawn lo chiangin, Leeds United, Southampton leh Wolves-te a hmachhawn thei dawn lo.

Norwegian manager Solskjaer chuan Telles inhliam chungchang sawiin, “Vanduaithlak takin Alex Telles-a chungchangah beisei aia chanchin tha lo kan dawnga, a ngal rek hliam chu kan rin aiin a serious a, a chawlh rih a ngai dawna, August thla pum chu a chawlh a ngai dawn niin a lang,” a ti.

United hian Telles hi nikum nipui bazar lai khan Portuguese club FC Porto atangin an leia, a manah pound 15.4 sengin, Telles hian Luke Shaw a nek chhuak thei meuh rih lo a ni.