Zanin zanlai hian Arsenal chuan Manchester City an tlawh dawn, he Premier League match hi a pawimawh dawn khawp mai, a chak zawk zawk chu champion tura dinhmun nei tha zawk an ni tawh dawn.
An inkhelh hma press conference an neih tumin Manchester City boss Pep Guardiola chuan, a hmachhawn tur Mikel Arteta nena an inkar chu a danglam tawh thu a sawi a, hetih lai hian an inngainatna erawh a la danglam lo thung.
December 2019-a Arsenal manager atana rawih a nih hma khan Arteta chu Etihad Stadium-ah Guardiola assistant a ni thin a, kum 3 lai an thawk dun hman. Unai Eremy ban a nih hnuah amaha ke pen hrang turin Arteta chuan City a chhuahsan ta a ni.
Arsenal-a a season hmasa berah Arteta chuan Fa Cup a chawi nghal, tunah a pu hlui nen Premier League title race-ah an inbei mek bawk. Kum 2004 atang khan Gunners hi League-ah an la champion leh miah lo a, kum 2008 hnu lamah atang khan title beisei thei dinhmunah pawh an ding tawh ngai lo, tun season erawh rei tak hma an hruai ta a nih hi.
Guardiola chuan a hma anga an inkar a awm theih tawh lo thu a sawi a.
"Kan inkar hi a hma ang a ni tawh lo. A chhan chu amah London-ah a awm a, kei Manchester-ah. Duh angin kan inhmu zing thei lo. A buai a, kei ka buai bawk a, mahse kan inngainatna leh inzah tawnna hi chu a danglam ngai lovang, chu chu amah pawhin a hria.
"England team tha ber nena kan khelh hnuhnung ber tur a ni a, point 5-in kan um pha lo mek bawk. He niah hian tantu kan neih ngei ka beisei. A tir atanga a tawp thlengin thlawptu awrawl hriat kan inbeisei," tiin Guardiola chuan a sawi bawk.
Etihad Stadium-ah hian Arsenal hian hnehna an chang thei ang em? tih chu zawhna a ni a, an inhnehtawk emaw an chak lo emaw a nih chuan City tan kawng an kian tihna a ni dawn.
Khelh 32 atangin Arsenal hian point 75 an hlawhchhuak tawh a, league game hnuhnung 3-ah an khingpui an inhnehtawkpui vek. Anni aia game hniha khel tlem Manchester City chuan point 5-in an phak lo mek a.
Arsenal hian Etihad Stadium-ah hian dinhmun siamthatna hun an nei thei, hetih lai hian Manchester City hian hnehna an chang a nih chuan, Arsenal tan title beiseina a thamral chho dawn niin a lang.