Arsenal manager Mikel Arteta chuan January thla-a thlasik bazar a inhawn hunah Fulhma midfielder Joao Palhinha lakluh a duh niin English chanchinbu mite chuan an tarlang nasa hle.

Arteta hian thlaleha transfer window a inhawn hunah midfielder lakluh ngei a tum niin chanchinbu mite chuan an ziak a, Arsenal hian Palhinha an lak theih dawn chuan an midfielder Thomas Partey an chhuah tir ve thung a rinawm bawk.

Kumin nipui bazar inhawn lai khan Palhinha hian Fulham a chhuahsan teuh hle a, a manah Fulham leh Bayern Munich chu pound maktaduai 55 in inrem hman vek mah se, a tawpah a tlawlh a, Portuguese midfielder hi Fulham-ah a cham chhunzawm.

Bayern hian Palhinha hi la duh mah se, Arsenal hian chak taka hmalak an tum nia sawi a ni a, Arsenal leh Fulham te hi a manah an inrem thei a nih chuan kum 28 mi hian Fulham chhuahsan a hnial a rinawm loh.

Palhinha hi Juventus nen pawh sawi zawm a ni a, mahse Premier League hmahruai mektu Arsenal hian chance an nei tha ber nia tarlan a ni a, season chawhnu lamah Palhinha hi Arsenal tan a khel maithei.

Kumin nipui lai khan Arsenal hian pound maktaduai 105 zet sengin Declan Rice chu West Ham atangin an lalut a, sum tam tak an sen tawh avangin Arsenal hian Palhinha an dawr dawn a nih chuan an midfielder Partey an hralh hmasak phawt a rinawm a ni.