Arsenal leh Chelsea te chu Noni Madueke chungchangah an indawr a, £52million velin an inrem chho dawn ta niin The Athletic chuan a tarlang.

Arsenal leh kum 23 mi Madueke te hi mimal thilah an inrem tawh a, kum 5 chhung atan Emirates Stadium-ah contract a ziak ang a, hetah hian hun rei zawk atana pawhsei theihna ziah tel a ni dawn bawk.

Madueke hi United States-ah a awm ve mek a, Pathianni zan hian Club World Cup final-ah PSG nen an inhmachhawn ang.

Season liamta khan Madueke hian Chelsea tan competition hrang hrangah game 46 a khel a, tun Club World Cup-ah pawh vawi 5 a inlan a, season liamta Premier League-ah khan game 32 a khel ve bawk a ni.

Madueke hian a naupan laiin Tottenham leh Crystal Palace-ah te hun a hmang a, PSV Eindhoven tan kum 5 a khel a, chumi hnu kum 2023 khan Chelsea a zawm. Blues tan game 92 khel tawhin, goal 20 a khung ve tawh a, England tan vawi 7 a inlan tawh bawk.

Arsenal supporter eng emaw zat chuan Madueke hi an duh lo a, lak loh hram an duh. Nimin lam khan petition te neiin, signature 2200 vel an la khawm hman niin Telegraph chuan a tarlang.

Madueke hi Arsenal mamawh ber a ni em? Nikum nipui bazar lai khan Centre forward tha tak Arsenal hian an mamawh niin an sawi a, mahse Arteta chuan a ngaihsak lo.

Tunah Sesko an lei ngam lo a, Viktor Gyökeres nen indawrna an nei chho mek a, mahse a man chungchangah erawh an la inrem thei lo nia report a ni. Hetih lai hian Madueke manah erawh £52million an thehchhuak hmak bawk si, Arsenal suppoter tam tak chuan Gyökeres an lak theih loh mai an hlauthawng mek a ni.