Ram tana a fehchhuahnaah Bukayo Saka chu a inhliam tlat mai. Nizan khan England chuan 2-1 in Greece an hneh lo, inhliam avangin Arsenal winger hi minute 51-ah lak chhuah a ni.

Kum 23 mi Saka hian a ke veilam a dawm a, chumi hnuah mual chhungah a thu a, England coach chuan la chhuakin, a aiah Noni Madueke a luhtir.

England interim coach Lee Carsley chuan, "Saka chungchang hi kan ngaihven zui reng a ni. Goal hmasa ber a luh dawnah khan harsatna a tawk tawh tih kan hria," tiin a sawi.

Three Lions hi Jack Grealish leh inhliam Harry Kane te tel loin an fehchhuak a, Pavlidis chuan Greece tan goal hnih a khung a, England tan Bellingham chuan goal khat a khung a, 2-1 in Greece an chak.

Ram tana an fehchhuahnaah hian player an inhliam fo. Arsenal captain Martin Odegaard pawh September thlaa Norway tana a fehchhuahnaah a inhliam a nih kha.

Saka inhliam ve leh hi Gunners tan chuan a pawi dawn hle, October ni 19-ah league match an khel tan leh ang a, an match hmasa berah Arsenal hian Vitality Stadium-ah Bournemouth an tlawh dawn a ni.