English player naupang, Arsenal atanga loan-a chhuak Folarin Balogun hi kan hriat ngai a ni emaw chu? Loan-a a khelhna Reims lamah Paris Saint-Germain star player pathum Kylian Mbappe, Lionel Messi leh Neymar te aiin Ligue 1 ah goal a thun hnem tawh zawk. 

Kum 21 a upa Balogun hian Arsenal atangin Middlesbrough lamah loan-in season hmasa lam khan a lo khel tawh a, goal thum a thun. Tun season-ah Ligue 1 club Reims lamah loan bawkin a kal ve leh a, hetah hian top scorer va niin, goal 14 ngawt a thun tawh a. He thu hriat hi Arsenal tan chuan thil lawmawm tak a ni ngei ang.

England Under-21 international top scorer hian ni 10 vel liamta khan injury-time chhungin PSG lakah goal a thun a, an in-draw phah a, tun thla tir te pawh khan Lorient lakah hat-trick siamin Reims a lo chakpui tawh bawk. Reims hi kum 30 a upa Englishman Will Still-a enkawlna hnuaiah an khel a, professional football la khel ngai miah lo a ni bawk.

Europe khawpui chhunga league lian panga te zingah Balogun aia tun season-a goal thun hnem chu Erling Haaland, Harry Kane leh Victor Osimhen te chauh an ni.

Balogun hi Premier League hmahruai mektu Arsenal lamah hian nipui ah a let leh dawn a, kum 2021 khan Emirates ah hian kum 4 daih contract a ziak. Gabriel Jesus a inhliam avanga hmun chang, rawn khel tha em em Eddie Nketiah aiin kum 2 chauhin Balogun hi a naupang zawk bawk.

Nketiah hi tun season-ah Arsenal tana goal thun hnem ber ni lai mek a ni a, inelna hrang hrangah goal 9 a thun tawh. Jesus khan goal 5 a thun hman bawk. Hetihlai hian Balogun hian French Cup a khelhna hmasa bera a goal thun telin goal 15 a thun tling tawh a, Nketiah leh Jesus te goal thun belhkhawm ai pawn a la tam zawk cheu a ni.