Arsenal supporter thahnem tak chuan an manager Mikel Arteta chungah rinna an nghat ngam tawh lo a, tunah hian sawiselna lian tak a awm chho mek.

EFL Cup semi-final lut mah se, first leg-ah si hnih faiin Newcastle an chak. FA Cup-ah lah 10-a khel Manchester United an hneh zo lo. Premier League-ah hmahruaitu Liverpool chu point 7-in an phak mek bawk a, team game hmuhnawm tak lantir thin mah se, Premier League leh Champions League lama trophy an chawi loh chuan Arsenal supporter te an lungawi thei dawn lo.

Player a nih laiin Arsenal tan game 100 aia tan a khel a, manager a nih hnuin Arsenal chu kum 5 a enkawl tling tawh a, Premier League manager tang lai zingah chuan team chelh rei pathumna a ni.

Kum 2020 FA Cup bak kha chawi a la nei lo, Erik ten Hag erawh kum hnih khat leh Old Trafford-a a cham chhungin trophy pahnih a chawi hman. Arteta erawh Emirates Stadium-a a cham chhung hian trophy 1 chiah a la chawi.

Tun season Premier League-ah pathumna an ni mek a, FA Cup atangin tla tawh mah se, League Cup-ah an la dam a, Champions League lamah pawh beiseina an la nei mek reng. Hetih lai hian Arsenal supporter tam tak chuan Arteta chungah rinna an nghat ngam tawh lo a ni.

Kum hnih thum liamta chhung khan Manchester City um thei ber an ni a, league-ah hma hruai thin mah se, season tawpah an champion lo leh nge nge thin. 

Tunah hian Arsenal supporter te chuan striker tha tak an mamawh niin an inhria. Hetih lai hian Arteta erawh chuan hmatawng lam lak an rilruk lem lo. Pep Guardiola ang deuha striker tawrawt tak nei lo pawha champion theih a inring niin a lang a, khel tha thin viau mah se, an champion lo leh chiah chiah thin a ni.

Tin, supporter tam tak chuan Arteta hian plan B a nei lo niin an ngai bawk. Player pawimawh pahnih khat an inhliamin an buai em em ziah a, tunah hian player inhliam an nei chho ve leh nual a, season chawhnu lamah hian Liverpool an um theih pawh ring lo fans zingah an tam ta hle.