Arsenal chuan Nilaini zan khan Chelsea atanga Kai Havertz an lakluh thu an puang a, Arsenal hian Havertz hi a contract chungchang chiang takin tarlang lo mah se, hun rei daih contract an ziahpui thu an tarlang thung.

Arsenal hian German forward manah hian pound maktaduai 65 an senga, Havertz hi tun nipui bazar chhunga Arsenal player lakluh hmasak ber a ni.

Kum 2020 khan Chelsea chuan Bayer Leverkusen atangin Havertz hi an lei a, a manah pound maktaduai 75 an seng a, kum 2021-a Chelsea in UEFA Champions League nomawi an chawi khan kum 24 mi hian final-a goal awmchhun a khung nghe nghe a ni.

Tun nipui bazar inhawn tirh khan Arsenal chuan Havertz hi an dawr nghal a, Chelsea hian player hralh chhuah an mamawh bawk nen Arsenal-in a man zata an thehchhuah hian an lung a ti awi viau nia tarlan a ni.

Havertz hian Chelsea-ah kum hnih daih contract la nei mah se, Arsenal zawm a duh avangin Chelsea hnenah hian Arsenal zawm a dil niin chanchinbu mite chuan an ziak a, Stamford Bridge-a kum thum a awm hnuah a inpu chhuak.

Chelsea hian Havertz hi forward-ah an hmang nasa ber a, season liamta khan striker angin Havertz hi a khel tam hle a, mahse Arsenal manager Mikel Arteta chuan Havertz hi midfield-a an chhawr tur thu a sawi.

Arsenal hian player pahnih dang an lalut leh dawn a, West Ham midfielder Declan Rice chu British transfer record in an lalut fel thuai dawn a, Ajax defender Jurrien Timber pawh an lakluh a rinawm a ni.