Gabriel Jesus a inhliam rei deuh dawn avangin Mikel Arteta chuan striker a zawng mek a, Europe league lian danga striker te ngaihven kual mah se, an tum angin hma an sawn chak thei lo.

Kar tawp lama chanchinthar kan hriat chu, Arsenal-in Ollie Watkins an ngaihven tih hi a ni ta a ni. Aston Villa hmatawng Watkins hi a naupan lai atanga Arsenal supporter a ni a, Gunners hian lak an tum chuan thil a awlsam zuih maithei niin Mirror chuan a tarlang.

Mikel Arteta chuan striker an zawn thu a sawi chiang a, Benjamin Sesko, Matheus Cunha leh Mathys Tel te an ngaihven. Mahse transfer window a inkhar tep tawh, an duhthusam angin Arsenal hi an che thei lo. Premier League-a tlangnel tawh sa Watkins-a lam an hawi ta nia report a ni.

Arsenal chuan Watkins-a manah hian  £60million an thehchhuak niin Mirror chuan a tarlang a, transfer window inkhar hmain an indawr dawn nia tarlan a ni bawk.

Kum 29 mi Watkins hi Premier League-ah na na na chuan hmatawng zia pawl tak a ni. Arsenal fan a ni thin a, "Arsenal tana khelh te chu ka suangtuahna a ni, engtikah emaw chuan ka la khel ve mahna," tiin kum 2020 khan Sports Gazette a hrilh a nih kha.

"Arsenal tan khel ilang chuan, ka pu leh ka patea te chu an va han hlim dawn tak em! Anni hi Arsenal fan ruh tak an ni a, kei pawh Arsenal fan ka ni bawk," tiin Watkins chuan a sawi bawk.

Tin, Watkins hian Premier League-a striker tha ber nia a hriat chu Arsenal mihrang Thierry Henry kha a ni a, a inkhel a en nasat thu leh, a entawn thin thu a sawi tel nghe nghe.

Tun kar chhung khan Arsenal chuan Watkins lak tumin hma an la a, mahse Arsenal dawrna hi Aston Villa chuan an lo hnar niin ESPN chuan a tarlang. 

Kar leh thawhtanni hi transfer khar ni a lo ni ta a, hemi hma ngei hian Arsenal chuan Aston Villa hi dawr nawn leh an tum niin ESPN chuan a tarlang bawk.