Transfer deadline day-ah Raheem Sterling chuan Arsenal a pan a, Chelsea forward hian tun season chhung atan Gunners hi loan-in a zawm a, hetah hian inlei theihna thuthlung erawh an ziak lo a ni.

Kum 29 mi hi tun season-a Chelsea team-ah a leng ve lo a, Blues boss Enzo Maresca chuan a plan-a a tel ve loh thu a sawi chhuak a nih kha.

"Ka phur khawp mai, ka awm dan hi sawichhuah thiam pawh a har. Hun tawp dawn tak takah Arsenal ka pan, mahse hei hi ka beisei ruk em em a ni reng a.

"Arsenal inrelbawl dan chungchang ka thlir a, ka tana inkhelhna tur hmun tha tak niin ka ngai a, ka hlim tak zet a ni," tiin Sterling chuan a sawi.

Kum 2022 July thla khan Sterling hian Man City atangin Chelsea a zawm a, an inleina man zat kha £50m lai a ni. Blues tan Sterling hian game 81 a khel a, goal 19 a khung hman bawk.

Chelsea-in neitu thar Todd Boehly an nei khan Liverpool forward hlui hi an lak luh hmasak ber a ni nghe nghe a nih kha.

Season liamta khan Blues tan Sterling hian competition hrang hrangah game 43 a khel a, mahse Maresca chuan chhawr a tum ta lo a ni.

Mikel Arteta hian Manchester City-ah Sterling hi a lo hrawn tawh thin a, a hrechiang em em a, hei vang hian chhawr tangkai theih dan a ngaihtuah ta a ni.

England tan Sterling hian game 82 a khel tawh a, Euro 2020-a pahnihna an nih tum pawh khan player tangkai ber pakhat a ni, hetih lai hian kum 2022 December thla atang khan ram tan a la inlan leh lo a ni.