Arsenal chuan Denmark midfielder Christian Norgaard chu an la lut fel ta a, an inleina hi £10m bakah add-ons £5m a ni.

Norgaard hian Emirates Stadium-ah kum 2 daih contract a ziak a, kum khat dang atana pawhsei theihna ziah tel a ni bawk.

Norgaard hian kum 2019 khan Fiorentina atangin Brentford hi a zawm a, Brentford captain ni chhunzawmin, game 196 a khel ve hman.

Heti hian Arsenal hian tun nipui bazarah player 3 an la lut ta a, Martin Zubimendi leh Kepa Arrizabalaga te hnung Norgaard hian a zui ta a ni.

"Kum 31 ka tling tawh, Brentford tan contract thar ka ziak hlim deuh hlawl. Chutih laiin Brentford tan Champions League khelh a har dawn tih ka hria, chance chu a awm tho maithei a, mahse thil danglam a thlen erawh a ngai ang.

"Tunah erawh ka chak ber Champions League hla sa ve thei dinhmunah ka ding ta a, ka naupan lai atanga ka suangtuahna niin, a tak ram a thlen pawh ka lo ring ngai lo. Ka tan chuan Arsenal zawm hi a hluin ka hlim em em a ni," tiin Norgaard chuan a sawi.

Kum 2021 khan Premier League-ah an kai theih nan Norgaard hian Brentford tan tha a thawh nasa hle. Premier League-a tawnhriat ngah tawh a ni a, tlem chuan a upa ve deuh hret tawh, chutih laiin squad tihchhah nan chuan a tangkai dawn khawp mai.